Lexoje këtu nëse e ke me ngut!
Indeksi i Harmonizuar i Çmimeve të Konsumit, që mat rritjen e çmimeve sipas metodologjisë së Eurostat, për muajin korrik 2025 regjistrohet në 2.4%.
Ky nivel e vendos Shqipërinë në të njëjtin kufi me mesataren e inflacionit në Bashkimin Europian, duke treguar se sot qytetarët shqiptarë paguajnë thuajse të njëjtat çmime si qytetarët europianë.
Por ndryshe nga vendet e BE-së, ku të ardhurat mesatare janë disa herë më të larta, Shqipëria ka ende një nga pagat më të ulëta në rajon.
Ky kontrast e bën përballimin e çmimeve “europiane” jashtëzakonisht të vështirë për familjet shqiptare, të cilat shpesh mbështeten tek ndihma financiare e emigrantëve apo të ardhurat dytësore për të mbyllur muajin.
Në nivel rajonal, Shqipëria raportohet me inflacion më të ulët se fqinjët. Për korrikun, Maqedonia e Veriut regjistroi 4.6%, Kosova 4.3%, ndërsa më të lartat u shënuan në Rumani me 6.6%, Estoni me 5.6%, Mal të Zi me 4.7% dhe Serbi me 5%.
Sipas grupeve të mallrave dhe shërbimeve, rritja më e madhe e çmimeve në Shqipëri u vu re tek “Argëtimi dhe kultura” me 12%, e ndjekur nga “Pije alkoolike dhe duhan” dhe “Hotele, kafene dhe restorante” me 3.3% secili. Ndërkohë, ushqimet bazë dhe pijet joalkoolike u rritën me 1.8%, ndërsa energjia, qiratë dhe lëndët djegëse shënuan një rritje minimale prej 0.3%. Ulje pati vetëm tek transporti, me 0.8%.
Në thelb, Shqipëria po paguan me çmime europiane, por me të ardhura “shqiptare”, duke e shtuar barrën mbi konsumatorët dhe duke theksuar kontrastin mes standardit të jetesës dhe nivelit të të ardhurave.
The post Shqipëria me çmime europiane, por me rroga shqiptare appeared first on GIJOTINA.
