Lexoje këtu nëse e ke me ngut!
Një figurë e re dylli e këngëtares dhe aktores Lady Gaga u prezantua të martën (2 dhjetor) në Madame Tussauds Las Vegas.
Figurina është e veshur me një fustan mëndafshi në ngjyrë trëndafili, me pala dhe i zbukuruar me kristale e bizhuteri, ndërsa përfshin edhe kopje të tatuazheve të Lady Gaga-s. Frymëzimi për këtë paraqitje vjen nga rezidenca e saj “Jazz & Piano”, e cila u zhvillua në Las Vegas nga janari 2019 deri në korrik 2024.
“Lady Gaga përfaqëson gjithçka për të cilën njihet Las Vegasi – glamur, kreativitet dhe spektakël,” tha drejtori i Madame Tussauds Las Vegas, Gabriel Hewitt. “Figura e saj e re është një celebrim i këtij shpirtërimi, duke u dhënë vizitorëve mundësinë të ndajnë një moment të paharrueshëm me një nga performueset më magjepsëse të muzikës.”
Fituesja e 14 çmimeve Grammy, e cila në vitin 2019 fitoi edhe Oscar-in për këngën më të mirë origjinale me “Shallow”, njihet për hitet “Poker Face”, “Just Dance” dhe “Die With A Smile” me Bruno Mars.
Së fundmi, Gaga është shfaqur në ekran në sezonin e dytë të serialit të Netflix, “Wednesday”, ku luan profesoreshën shpirtërore Rosaline Rotwood.
Këngëtarja 39-vjeçare është e nominuar për shtatë çmime Grammy në edicionin 2026 të ceremonisë.
Figura e Lady Gaga-s do të jetë e hapur për publikun duke nisur nga e premja, 5 dhjetor./mxh
