Kryeministri i Kosovës, Albin Kurti gjatë vizitës së tij në Londër ka zhvilluar një takim me Sekretaren për Punë të Jashtme të Mbretërisë së Bashkuar, Yvette Cooper.
Në takim, Kurti shprehu falënderime dhe mirënjohje për mbështetjen e vazhdueshme të Mbretërisë së Bashkuar për Kosovën, duke e theksuar marrëdhënien e fortë dhe të qëndrueshme ndërmjet dy vendeve, të bazuar në vlerat e përbashkëta demokratike dhe angazhimin për sigurinë dhe prosperitetin evropian.
Ndër të tjera ai theksoi se Mbretëria e Bashkuar është partner kyç strategjik dhe u zotua për thellim të bashkëpunimit. Ata floën edhe lidhur me zhvillimin ekonomik të vendit teksa Kurti theksoi rritjen e buxhetit dhe rishpërndarjen e drejtë të tij.
Kurti foli për investimet në fushën e mbrojtjes, ushtrimet e përbashkëta dhe bashkëpunimin me Mbretërinë e Bashkuar për të ofruar trajnime dhe mbështetje për Ukrainën. Ai ndër të tjera vlerësoi procesin e zbatimit të plotë, gradual dhe pa përjashtime të Ligjit për të Huajt.
Kurti theksoi se anëtarësimi i Kosovës në NATO dhe në Bashkimin Evropian, si synime strategjike, janë thelbësore për sigurinë, stabilitetin dhe prosperitetin afatgjatë.
Ai informoi Cooper për kërcënimet e vazhdueshme nga Serbia, me mbështetjen e Rusisë, përfshirë operimin me 48 bazat ushtarake të përparme operacionale përreth kufirit me Kosovën.
Lidhur me dialogun me Serbinë, ai përsëriti tri parakushtet për vazhdimin e procesit: dorëzimin nga Serbia të kryekriminelit Milan Radoiçiç, tërheqjen e letrës së ish-kryeministres Bërnabië, dhe nënshkrimin e Marrëveshjes së Ohrit.
Sipas tij Kosova është e përkushtuar për normalizim të plotë të marrëdhënieve me Serbinë nëpërmjet një marrëveshjeje ligjërisht obliguese të bazuar në njohje të ndërsjellë.
The post Vizita në Londër, Kurti takim me sekretaren britanike për Punët e Jashtme, Cooper appeared first on Euronews Albania.
