Premiera e komedisë “Sonte do darkojmë në shtrat” është shfaqur në teatrin e Gjirokastrës, duke tërhequr interesimin e publikut dhe artdashësve të qytetit.
Vepra e shkruar nga autori francez Marc Camoletti, i njohur për suksesin e komedisë “Boeing Boeing”, vjen për publikun shqiptar nën regjinë e Kiço Londos.
Subjekti rrëfen historinë e një çifti bashkëshortor që planifikon takime të fshehta në të njëjtën kohë dhe në të njëjtin vend, duke krijuar një varg situatash komike dhe keqkuptimesh.
“Ky është një sfidë për ne aktorët, realisht edhe sot shkoi shkëlqyer. Në Gjirokastër gjithmonë kemi një mikpritje të ngrohtë. Unë personalisht kisha shumë emocione sepse kisha shumë të njohur në sallë dhe kështu që kaluam shumë bukur sot në Gjirokastër. Do vazhdojmë me këtë shfaqje edhe në qytete të tjera”, tha aktori Erdit Asllanaj.
Edhe aktorja Esmeralda Metka vlerësoi pritjen e publikut, duke theksuar emocionet e rikthimit në skenën e teatrit të Gjirokastrës pas shumë vitesh.
“Në këtë skenë unë kam qenë që e vogël, kisha shumë vite pa shkelur në këtë teatër dhe vërtet më ka pëlqyer publiku, shumë artdashës, shumë pozitiv, ka reaguar gjatë gjithë kohës dhe jo vetëm në sallë por edhe pas kuintave”, tha ajo.
Përgjatë këtij sezoni kulturor, skena e teatrit “Zihni Sako” ka mirëpritur një sërë aktivitetesh artistike me pjesëmarrjen e aktorëve shqiptarë dhe të huaj.
The post Komedia “Sonte do darkojmë në shtrat” ngjitet në skenën e teatrit në Gjirokastër appeared first on Euronews Albania.
