Bashkimi Evropian nuk do të kushtëzohet nga miratimi i një ndalimi të plotë të shërbimeve detare për tankerët rusë të naftës nëse aleatët e G7-ës nuk arrijnë një marrëveshje të përbashkët. Kështu deklaroi Valdis Dombrovskis, Komisioneri Evropian për Ekonominë, teksa vijojnë negociatat mes shteteve anëtare për një raund të ri sanksionesh ekonomike kundër Kremlinit.
Sipas tij, Brukseli synon që paketa e 20-të e sanksioneve të miratohet deri më 24 shkurt, kur pushtimi në shkallë të plotë i Ukrainës shënon përvjetorin e katërt.
Në rast se ndalimi i propozuar për shërbimet detare miratohet, mekanizmi i vendosur nga G7 për kufizimin e çmimit të naftës ruse – në fuqi që nga dhjetori 2022 – do të pushojë së zbatuari brenda juridiksionit të BE-së. Kjo pasi kompanive evropiane do t’u ndalohet të ofrojnë shërbime për cisternat ruse, pavarësisht çmimit me të cilin shitet nafta e papërpunuar e tipit Urals.
“Ne ua kemi paraqitur partnerëve tanë të G7-ës skicën e masave që duhen ndërmarrë, sepse është padyshim më mirë të ecim në mënyrë të koordinuar”, tha Dombrovskis të martën pas një takimi të ministrave të financave në Bruksel.
Ai theksoi se një marrëveshje e përbashkët nuk është parakusht absolut, por sa më i lartë të jetë niveli i përafrimit, aq më efektive do të jenë masat. “Ne nuk do të hezitojmë të ndërmarrim hapa edhe në nivelin e BE-së nëse një marrëveshje më e gjerë nuk arrihet”, përfundoi ai.
The post Sanksionet ndaj naftës ruse, BE: Presim një marrëveshje me aleatët e G7 appeared first on Euronews Albania.
