Lexoje këtu nëse e ke me ngut!
Një figurë e re prej dylli e aktores Gillian Anderson, e veshur me një fustan të bardhë pa rripa të qëndisur me motive në formë vulvash, po vendoset në ekspozitë në Madame Tussauds London.
Figura është frymëzuar nga fustani i personalizuar i Gabriela Hearst që 57-vjeçarja e veshi në ceremoninë e Golden Globe Awards në vitin 2024. Ky fustan, nga ana tjetër, u frymëzua nga personazhi Dr. Jean Milburn, terapistja e seksit që Anderson interpretoi në serialin e njohur “Sex Education”.
“U kërkova të zgjidhja një fustan të tapetit të kuq, dhe mendoj se ky fustan jo vetëm bëri përshtypjen më të madhe atë ditë në Golden Globes, por gjithashtu u krijua nga një mike e imja, Gabriela Hearst, dhe u konceptua me qëllim dhe mesazh,” tha Anderson në një intervistë.
Drejtori i përgjithshëm i Madame Tussauds, Steve Blackburn, deklaroi: “Të kemi Gillian Anderson në mesin e yjeve tanë është një nder i madh. Ajo është ikona perfekte moderne, nga legjendë e sci-fi te një figurë e guximshme e tapetit të kuq. Të punosh me të ka qenë një kënaqësi e vërtetë.”
Ai shtoi: “Ekipi ka derdhur gjithë mjeshtërinë e tyre për të rikrijuar çdo detaj të pamjes së saj, dhe mezi presim që vizitorët të ballafaqohen me këtë fustan mbresëlënës dhe provokues, të cilin Gabriela Hearst e ka dhuruar me mirësi për figurën e parë të Gillian-it.”
Fituesja e çmimit Emmy njihet për rolet e saj të ndryshme në teatër dhe ekran, nga Dana Scully në “The X-Files” te Margaret Thatcher në “The Crown”.
Figura e re do të vendoset në zonën Awards Party të muzeut, ku ekspozohen edhe figurat e Zendaya-s, Timothée Chalamet, Lil Nas X dhe Lady Gaga./mxh
