Shkrimtarja e njohur Lea Ypi ka reaguar këtë të mërkurë përmes një statusi në rrjetet e saj sociale, me një mesazh ironik dhe zemërim kundrejt gjithse komentimeve dhe teorive konspirative, që sipas saj janë ngritur ditët e fundit në media.
Lea Ypi e nis statusin e saj me thënien “Mirupafshim Shqipëri” e më pas vijon duke thënë se “shpifjet po ja u lënë në derë”.
Ypi ditët e fundit është përfolur se mund të jetë pjesë e drejtimit të një qeverie të mundshme teknike në Shqipëri, histori e cila sipas saj është mohuar kategorikisht dhe mbi të gjitha është ironizuar, diçka gati e dëmtshme për shqiptarët. Kështu është shprehur dhe gjatë një interviste të dhënë në Euronews Albania disa ditë më parë.
Statusi i saj:
Mirupafshim Shqipëri.
Llaçin e shpifjeve dhe pluhurin e konspiracioneve biografike, ideologjike, gjeopolitike, sociale, materiale e sa e sa të tjera më kanë dëgjuar veshët e parë sytë për veten këto ditë, ti kam lënë në derë. Në fund të fundit hiçi dixhital e mediatik mbi diçka duhet ngritur që atij grushti logosh ku tek asgjëja çlirohet vetmia, trishtimi, mllefi, dështimi, varfëria e mendimit, shfrytëzimi, paburrëria, ti mbushet mendja se mbase diçka është.
Por emocionet e takimeve të këtyre ditëve me qindra njerëz të vërtetë, lexues të gjithfarë brezave, bindjesh politike, përvojash historike, me aq shumë pyetje, vërejtje, komente, kritika, fjalë nxitëse, të rinj e të reja me guxim për tu parë në sy e për tu përballur pa u fshehur në lloj lloj pseudonimesh e maska karnavalesh, shkëmbimet tona rreth fateve të botës e të këtij katundit tonë, skutave të historisë, dritës që hedh arti në kërkim të së vërtetës – të gjitha këto i mbaj me vete.
Kam përshtypjen se bota sot i ngjan labirintit të minotaurit ku gjithkush kërkon shpëtim nga përbindëshat e dukshëm e të padukshëm. Ndoshta secili nga ne e mban në dorë një pjesë nga filli i Ariadnes, mjafton që duart të bashkohen dhe njerëzit të rigjejnë kuptimin e të qenit njeri.
Faleminderit të gjithë atyre që në këtë skutën shqiptare të labirintit shtrënguan dorën time.
The post “Mirupafshim Shqipëri”, Lea Ypi reagon ndaj akuzave dhe konspiracioneve mbi politikën: Shpifjet po ja u lënë në derë, asgjëja çliroj mllefin appeared first on Euronews Albania.
