Katari po zhvillon bisedime me FIFA-n për të organizuar Kupën e Botës për Klube të Femrave, një turne i ri që mund të ketë ndikim të ndjeshëm në kalendarin e sezonit 2027–2028, përfshirë ligat kryesore evropiane. Lajmi raportohet nga The Guardian.
Muajin e kaluar, FIFA njoftoi se gara do të zhvillohet nga 5 deri më 30 janar 2028, por ende nuk është përcaktuar vendi pritës, as nëse ka nisur zyrtarisht një proces ofertimi.
Interesi i Katarit shihet si pjesë e një strategjie afatgjatë për të konsoliduar pozicionin e tij si organizator i ngjarjeve madhore sportive. Pas Kupës së Botës për meshkuj 2022, Doha ka forcuar marrëdhëniet me FIFA-n dhe ka vazhduar të investojë në evente ndërkombëtare.
Së fundmi, Kupa Ndërkontinentale e Klubeve FIFA u zhvillua në Al-Rayyan në dhjetor, ndërsa finalja mes Spanjës dhe Argjentinës është planifikuar për në mars, gjithashtu në Doha.
Katari kishte shprehur më herët interes për të organizuar Kupën e Botës për Klube për meshkuj në vitin 2029, por projekti u pezullua pasi FIFA vendosi që turneu të zhvillohej gjatë verës.
Megjithatë, mundësia që Kupa e parë e Botës për Klube të Femrave të mbahet në Gjirin Persik pritet të shoqërohet me polemika. Kritikat lidhen kryesisht me mbrojtjen e të drejtave të komunitetit LGBTQ+ dhe me zhvillimin e kufizuar të futbollit të femrave në vend.
Kombëtarja e femrave e Katarit, e themeluar në vitin 2009, nuk ka zhvilluar ndeshje zyrtare prej vitesh dhe nuk figuron në renditjen e FIFA-s. Megjithatë, vendi ofron avantazhe si infrastruktura moderne dhe klima e favorshme gjatë muajve të dimrit.
The post Katari në bisedime me FIFA-n për Kupën e Botës për Klube të Femrave appeared first on Euronews Albania.
