Pas vendosjes së skanerëve të rinj të sigurisë CT, shumë aeroporte evropiane po heqin gradualisht limitin prej 100 mililitrash për lëngjet në bagazhin e kabinës, duke lejuar udhëtarët të mbajnë deri në 2 litra për enë të vetme. Kjo masë vjen pas një procesi që synon përditësimin e sigurisë ajrore, duke ofruar pamje 3D me rezolucion të lartë që zbulojnë eksplozivë të ngurtë dhe të lëngshëm.
Limitimi i 100 ml ishte vendosur në vitin 2006 pas një komploti të parandaluar në Mbretërinë e Bashkuar, dhe që atëherë ka kufizuar pasagjerët në kremra dhe shampoja të vogla. Me rregullat e reja, udhëtarët do të kenë mundësi të paketojnë më lirshëm, por duhet të jenë të kujdesshëm dhe të respektojnë udhëzimet e aeroportit.
Në Britaninë e Madhe, Aeroporti Heathrow ishte i fundit që implementoi ndryshimin, duke lejuar lëngje deri në 2L në të gjitha terminalet. Aeroporte të tjera si London Gatwick, Birmingham, Belfast dhe Edinburgh e kanë aplikuar tashmë. Stansted, City dhe Luton ende ruajnë disa kufizime, megjithatë lëngjet mund të vendosen direkt në çantat e kabinës.
Në Gjermani, Aeroporti i Mynihut lejon 2L në disa korsi sigurie, ndërsa Frankfurt dhe Berlin Brandenburg do ta zbatojnë gradualisht në terminalet e tyre që kanë skanerë të rinj CT. Autoritetet paralajmërojnë që korsi të tjera, që nuk kanë teknologjinë e avancuar, do të vazhdojnë të zbatojnë kufirin 100 ml.
Në Itali, aeroportet Milano Linate, Bolonja, Romë Fiumicino, Milano Malpensa (Terminali 1) dhe Torino kanë filluar të lejojnë lëngje deri në 2L, një lajm i mirë për turistët që vizitojnë vendin për Lojërat Olimpike Dimërore.
Aeroporte të tjera evropiane që e kanë rritur limitin përfshijnë Dublin, Vaclav Havel Pragë (Terminali 2), Vilnius, Kaunas, Kraków, Poznań, Cluj, Billund dhe Maltë. Schiphol në Amsterdam dhe Barcelona El Prat po ndjekin rregulloret, por ende nuk kanë dhënë detaje mbi rritjen në 2L.
Megjithatë, disa aeroporte kryesore, përfshirë Zaventem në Bruksel, Paris, Marsejë, Madrid, Athinë dhe Lisbonë, vazhdojnë të mbajnë kufirin 100 ml deri në përfundimin e përmirësimeve teknologjike. Athina planifikon implementimin e skanerëve të rinj në vitin 2027, ndërsa Paris synon të jetë gati deri në vitin 2030.
The post Aeroportet evropiane po heqin gradualisht kufirin 100 ml për lëngjet në bagazhin e kabinës appeared first on Euronews Albania.
