Teksa AC Milan vijon të përballet me paqartësi në strukturat drejtuese, ende pa emëruar trajnerin e ri, drejtorin sportiv dhe drejtorin teknik, Gerry Cardinale dhe Zlatan Ibrahimovic janë shfaqur së bashku në Uashington në një aktivitet të organizuar me rastin e ditëlindjes së presidentit amerikan, Donald Trump.
Në kuadër të festimeve u zhvillua edhe eventi “UFC Freedom 250”, i cili mblodhi një numër të madh personalitetesh nga bota e sportit, biznesit dhe politikës.
Prania e Cardinale dhe Ibrahimovic krah për krah, larg zhvillimeve që lidhen me merkaton dhe të ardhmen e klubit kuqezi, ka ngjallur reagime të shumta mes tifozëve të Milanit. Dyshja u pa pranë ringut gjatë mbrëmjes sportive, ku vëmendjen e mori edhe fitorja e Ciryl Gane ndaj Alex Pereira.
Pamjet e publikuara vijnë në një moment kur mbështetësit e klubit presin me interes lëvizjet e ardhshme të drejtuesve për organizimin e sezonit të ri. Në të njëjtën kohë, paraqitja e tyre së bashku shihet edhe si një sinjal për të zbutur spekulimet e fundit mbi raportet mes tyre.
Sipas mediave sportive, prezenca e përbashkët e Cardinale dhe Ibrahimovic synon të tregojë vazhdimësinë e bashkëpunimit institucional mes pronarit të klubit dhe ish-sulmuesit suedez, i cili aktualisht është i angazhuar edhe si komentator sportiv gjatë Kupës së Botës 2026.
The post Cardinale dhe Ibrahimovic në festën e Trump, mes pritjes për vendimet te Milani appeared first on Euronews Albania.
