Presidenti i Serbisë, Aleksandar Vuçiç, deklaroi se Kosova dhe Metohia janë pjesë e Serbisë, gjatë ceremonisë së promovimit të oficerëve të rinj të Forcave të Armatosura Serbe, të zhvilluar në kazermën “Gjenerali Jovan Mishkoviq” në Banjica të Beogradit.
“Ne nuk kemi asgjë më të shenjtë dhe më të rëndësishme. Kosova dhe Metohia është pjesë e atdheut tonë, pjesë e Serbisë, si sipas Kushtetutës ashtu edhe sipas drejtësisë së Zotit”, tha ai.
Duke folur për forcimin e ushtrisë, neutralitetin ushtarak dhe ruajtjen e integritetit territorial, Vuçiç tha se Serbia duhet të jetë mjaftueshëm e fortë për të mbrojtur veten, por pa kërcënuar apo sulmuar askënd.
Vuçiç deklaroi gjithashtu se Serbia ka nisur modernizimin e ushtrisë dhe pajisjen e saj me armatimet më të avancuara, duke argumentuar se kjo bëhet për mbrojtjen e vendit dhe jo për të kërcënuar të tjerët.
“Jemi armatosur dhe pajisur, jemi bërë një ushtri shumë më e fortë. Jo sepse duam të kërcënojmë dikë, por sepse kemi nxjerrë mësime të hidhura nga historia”, u shpreh presidenti serb.
Në ceremoninë e sotme u graduan 130 kadetë në gradat e para të oficerëve, 102 prej tyre nga Akademia Ushtarake dhe 28 nga Fakulteti i Mjekësisë i Akademisë Ushtarake Mjekësore.
The post Vuçiç: Kosova dhe Metohia janë pjesë e Serbisë, po forcojmë ushtrinë për të mbrojtur vendin appeared first on Euronews Albania.
