Presidenti i Federatës Shqiptare të Futbollit, Armand Duka, ka reaguar publikisht lidhur me vendimin e fundit të FIFA-s për t’u tërhequr nga plani i shitjes së një pjese të të drejtave të saj te investitorët privatë.
Përmes një deklarate zyrtare, Duka e mirëpriti këtë tërheqje, por theksoi se zhvillimet e ditëve të fundit kanë ngritur supozime dhe pikëpyetje serioze mbi integritetin, transparencën dhe qeverisjen e futbollit botëror që kërkojnë zgjidhje të menjëhershme.
Kreu i FSHF-së rikonfirmoi mbështetjen e tij të plotë ndaj qëndrimit të UEFA-s dhe bëri me dije se do të punojë ngushtë me presidentët e federatave kombëtare për të vendosur mekanizma mbrojtës që parandalojnë ngjarje të tilla në të ardhmen.
“E mirëpres vendimin e fundit të FIFA-s për t’u tërhequr nga plani per shitjen e një pjese të të drejtave të FIFAs tek investitorë privat që doli në dritë gjatë ditëve të fundit.
Megjithatë, zhvillimet që shoqëruan këtë proces kanë ngritur në mënyrë të pashmangshme pikëpyetje serioze mbi integritetin, transparencën, llogaridhënien dhe qeverisjen e futbollit, çështje që do të duhet patjetër të adresohen.
Vendimet që ndikojnë në qeverisjen e sportit tonë duhet të udhëhiqen gjithmonë nga standardet më të larta të transparencës, qeverisjes së mirë dhe përgjegjshmërisë institucionale. Këto parime janë themelore për mbrojtjen e integritetit të futbollit.
Mbështes plotësisht qëndrimin e UEFA-s. Së bashku me UEFA-n dhe kolegët e mi, presidentët e federatave kombëtare, do të punoj ngushtë për të siguruar që mësimet e nxjerra nga kjo situatë të përkthehen në hapa konkrete dhe që të vendosen mekanizmat e nevojshëm për të parandaluar përsëritjen e rasteve të ngjashme në të ardhmen.
Përgjegjësia jonë e përbashkët është të mbrojmë futbollin, të ruajmë vlerat e tij dhe të sigurojmë që ai të vazhdojë të qeveriset me integritet, transparencë dhe gjithmonë në interesin më të mirë të lojës dhe të gjithë atyre që janë pjesë e saj.
Edhe një herë u dëshmua se uniteti është vlera jonë më e madhe. UEFA tregoi sërish se, kur të gjithë aktorët e futbollit flasin me një zë të vetëm dhe qëndrojnë të bashkuar, gjithmonë mund të gjendet rruga e duhur”, ka shkruar Duka.
The post Armand Duka për vendimin e FIFA-s: Mirëpres tërheqjen nga plani për investitorët privatë, duhet transparencë appeared first on Euronews Albania.
