Kryetari i Nismës Socialdemokrate, Fatmir Limaj, ka marrë pjesë në protestën “Jo në emrin tim”, të zhvilluar në kundërshtim të aktgjykimit të shkallës së parë të Dhomave të Specializuara ndaj ish-krerëve të Ushtrisë Çlirimtare të Kosovës. Protesta është pjesë e tubimeve që po zhvillohen prej ditësh në Kosovë kundër vendimit të shpallur më 16 shtator.
Limaj tha se vendimi i Gjykatës Speciale ka nxjerrë në pah, sipas tij, krenarinë e qytetarëve për UÇK-në dhe kontributin e saj në çlirimin e Kosovës.
“Besoj që kjo situatë e rëndë pas vendimit të Gjykatës në Hagë ka çuar atë që ne e kemi ditur gjithmonë: Ushtria Çlirimtare e Kosovës është identitet i këtij kombi, i lirisë dhe siç kemi thënë ndërdijen e popullit të Kosovës e posaçërisht djemve e vajzave për të çliruar këto ditë kanë nxjerrë në pah që ndihen krenarë për baballarët e tyre. Ai produkt është vetë liria, shteti e krejt aio qe sot e gëzoni”, tha ai.
Kreu i Nismës argumentoi se aktgjykimi nuk duhet parë vetëm në raport me individët e dënuar, por e interpretoi atë si një përpjekje për të ndryshuar mënyrën se si trajtohet historia e luftës së Kosovës.
“Ndihem mirë që njerëzit e kanë kuptuar që ky aktgjykim nuk ka të bëjë me individin se ky aktgjykim ka një objektiv për të shlyer një histori e për të rishkruar një histori. Shteti dhe populli i Kosovës nuk lejon që t’i rishkruhet historia”, tha ai.
Limaj kishte kundërshtuar publikisht edhe më herët aktgjykimin e 16 shtatorit, duke e cilësuar atë të padrejtë dhe duke përdorur moton “Jo në emrin tim”. Vendimi i Dhomave të Specializuara është aktgjykim i shkallës së parë dhe nuk është përfundimtar.
The post Limaj në protestën “Jo në emrin tim”: UÇK-ja është identitet i këtij kombi dhe i lirisë appeared first on Euronews Albania.
