Lexoje këtu nëse e ke me ngut!
Nicolas Sarkozy u shpreh se dëshiron të “vërtetojë pafajësinë e tij” pasi u lirua nga burgu. Ai ka apeluar kundër dënimit të tij për konspiracion kriminal mbi një skemë për të marrë fonde të fushatës zgjedhore nga Libia.
Pas 20 ditësh në burg që ai e kishte përshkruar si “rraskapitës” dhe një “makth”, ish-presidenti francez u largua nga burgu “La Santé” në Paris të hënën i shoqëruar nga gruaja e tij, këngëtarja Carla Bruni-Sarkozy.
70-vjeçari shkroi në mediat sociale: “Ligji u zbatua. Tani do të përgatitem për një apel. Energjia ime është përqendruar vetëm në vërtetimin e pafajësisë sime. E vërteta do të triumfojë.”
Sarkozy shkoi në burg më 21 tetor, pasi një gjykatë e Parisit i dha atij një dënim me 5 vjet për konspiracion kriminal mbi një skemë për të marrë fonde të fushatës zgjedhore për garën e tij presidenciale të vitit 2007 nga regjimi i diktatorit të ndjerë libian Muammar Gaddafi.
Ai mohon të ketë bërë ndonjë shkelje dhe ka apeluar kundër këtij vendimi, me një gjyq të ri në apel të planifikuar për pranverën e ardhshme. Gjyqtarët vendosën muajin e kaluar se, për shkak të “rëndësisë së jashtëzakonshme” të dënimit të tij, ai duhet të shkojë në burg teksa procesi i apelit vazhdonte.
Megjithatë, një gjykatë apeli në Paris të hënën miratoi kërkesën e Sarkozisë për lirim. Sipas kushteve të lirimit të tij, Sarkozisë do t’i ndalohet të flasë me zyrtarë nga ministria e drejtësisë, përfshirë ministrin e drejtësisë, Gérald Darmanin.
Darmanin, i cili dikur e konsideronte Sarkozinë si mentorin e tij përpara se të ribashkohej me partinë e qendrës së Emmanuel Macron në vitin 2017, vizitoi ish-presidentin në burg muajin e kaluar. Disa magjistratë francezë e kritikuan këtë veprim si minim të pavarësisë së gjyqtarëve.
Sarkozisë gjithashtu do t’i ndalohet të flasë me të tjerët e përfshirë në çështje dhe do t’i ndalohet të largohet nga Franca.
Duke folur me videocall me gjykatën e apelit këtë të hënë në mëngjes, Sarkozi, i veshur me një kostum blu të errët, u shfaq në kamera nga burgu, i ulur në një tavolinë me avokatët pranë tij. Ai i tha gjykatës: “Dua t’i shpreh respektin të gjithë stafit të burgut, të cilët janë jashtëzakonisht humanë dhe që e kanë bërë këtë makth të durueshëm sepse është një makth.”
“Nuk kam pasur kurrë ndonjë ide ose qëllim t’i kërkoj Z. Gaddafi ndonjë lloj financimi… Nuk do të rrëfej kurrë diçka që nuk e kam bërë… Nuk e kam imagjinuar kurrë se në moshën 70 vjeç do të isha në burg. Është një sprovë që më është imponuar. E pranoj se është e vështirë, është shumë e vështirë. Lë gjurmë te çdo i burgosur sepse është rraskapitëse” – tha ai.
Sarkozi u mbajt në izolim për sigurinë e tij, në një qeli individuale prej rreth 9 metrash katrorë me dush dhe tualet personal. Dy truproja zunë një qeli fqinje për të siguruar sigurinë e tij. E përjavshmja franceze “Le Point” raportoi se ai kishte ngrënë vetëm kos në burg pasi kishte frikë se mos i kishin pështyrë ndonjë ushqim. Ai kishte ambiente për të gatuar vetë, por e refuzoi këtë, raportoi revista, duke cituar burime të paidentifikuara.
Avokati i Sarkozisë, Christophe Ingrain, i cili e kishte vizituar çdo ditë, tha se Sarkozi do të ishte më i sigurt jashtë burgut sesa brenda. “Ai është përballur me kërcënime me vdekje, ka dëgjuar britma natën dhe ndërhyrjen urgjente në një qeli fqinje kur një i burgosur është vetëlënduar.”
Sarkozy, i cili shërbeu si president i krahut të djathtë i Francës midis viteve 2007 dhe 2012, ishte ish-kreu i parë i një vendi të BE-së që kreu dënimin me burg dhe udhëheqësi i parë francez i pasluftës që shkoi pas hekurave.
Bruno Retailleau, kreu i partisë së djathtë të Sarkozy, “Les Républicains”, shkroi në mediat sociale se lirimi i Sarkozy-së ishte i pritshëm, duke thënë se ai “e kishte përballuar këtë përvojë të vështirë me guxim dhe vendosmëri”.
Llogaria e mediave sociale të Sarkozy-t javën e kaluar postoi një video me grumbuj letrash, kartolinash dhe paketash që thuhej se i ishin dërguar atij, disa duke përfshirë një kolazh, një çokollatë ose një libër. “Asnjë letër nuk do të mbetet pa përgjigje. Fundi i historisë nuk është shkruar ende” – shkruhej në të.
Gjatë gjyqit të tij 3-mujor, prokurori publik i tha gjykatës se Sarkozi hyri në një pakt korrupsioni me një nga diktatorët më famëkeq të 30 viteve të fundit” për të fituar fonde zgjedhore nga Gadafi.
Sarkozy mohoi shkeljet dhe tha se nuk ishte pjesë e një komploti kriminal për të kërkuar fonde zgjedhore nga Libia.
Ai u lirua nga tre akuza të veçanta për korrupsion, keqpërdorim të fondeve publike libiane dhe financim të paligjshëm të fushatës zgjedhore. Pasi prokurori i shtetit apeloi kundër lirimeve, Sarkozy do të rigjykohet për të gjitha akuzat vitin e ardhshëm, përfshirë komplotin kriminal.
Edhe pse akuzat për një pakt të fshehtë financimi të fushatës me regjimin libian përbënin gjyqin më të madh për korrupsion me të cilin ishte përballur Sarkozy, ai ishte dënuar tashmë në dy raste të veçanta dhe ishte zhveshur nga çmimi më i lartë i Francës, “Legjioni i Nderit”.
Sarkozy është edhe ish-kreu i parë i shtetit francez i detyruar të mbante një byzylyk elektronik pasi u dënua në një rast të veçantë për korrupsion dhe ushtrim ndikimi mbi përpjekje të paligjshme për të siguruar favore nga një gjyqtar.
Në atë rast, atij iu dha një dënim me 1 vit burg, por ai mundi ta vuante atë me një byzylyk elektronik në kyçin e këmbës. Ai e mbajti atë për 3 muaj para se t’i jepej lirim me kusht. ©LAPSI.al
The post Sarkozy lë burgun/ 20 ditë në qeli nuk hëngri asgjë përveç kosit appeared first on Lapsi.al.
