Një ngjarje tragjike ka ndodhur në Korinth, ku një 17-vjeçar shqiptar, Aleks Vangjeli, ka humbur jetën pas një përleshjeje me një të ri grek. Sipas autoriteteve greke, Vangjeli u paraqit në spital me plagë në zonën e barkut dhe fillimisht deklaroi se kishte pësuar një aksident me makinë. Ai u dërgua me urgjencë drejt Athinës, por fatkeqësisht nuk mundi t’i mbijetojë plagëve të marra, ndërsa një nga plagët në gjoks i kishte dëmtuar zemrën.
Në të njëjtën kohë, një 19-vjeçar grek, gjithashtu i plagosur me thikë, u paraqit në një klinikë private në Korinth. Ai pretendoi se ishte aksidentuar, por hetuesit besojnë se plagët janë të lidhura me të njëjtin incident dhe po hetojnë rolin e tij në përleshje.
Ngjarja dyshohet se ka ndodhur në orët e para të mëngjesit të së premtes në lagjen Lutraqi, ndërsa shkaqet e përleshjes mes të rinjve ende nuk janë të qarta. Autoritetet dyshojnë se konflikti ka lindur për motive të dobëta, ndërsa hetimet vijojnë për të sqaruar rrethanat dhe për të identifikuar përgjegjësit.
Pak para mesditës, 19-vjeçari u transferua nga Spitali i Korinthit në Spitalin Sotiria në Athinë, ku iu nënshtrua një ndërhyrjeje kirurgjikale dhe aktualisht po trajtohet në Klinikën Kirurgjikale. Ai nuk ka dhënë detaje rreth asaj që ndodhi para përleshjes, duke thënë vetëm se 17-vjeçari i vdekur ishte shoku i tij.
Komuniteti lokal është tronditur nga kjo tragjedi, ndërsa autoritetet vazhdojnë hetimet për të sqaruar të gjitha rrethanat e vdekjes së Aleks Vangjelit dhe për të identifikuar të gjithë të përfshirët.
The post Përleshje me thika mes të rinjve, 17-vjeçari shqiptar humb jetën në Greqi appeared first on Euronews Albania.
