Kampionët e botës, Argjentina, do të përballen këtë të premte me Mauritaninë në stadiumin legjendar “La Bombonera” në Buenos Aires, në një miqësore që ka ngritur pikëpyetje për nivelin e kundërshtarëve të zgjedhur. Mauritania renditet e 115-ta në FIFA, ndërsa katër ditë më vonë pritet edhe një tjetër ndeshje ndaj Zambias (vendi i 91-të).
Zgjedhjet vijnë pas anulimit të “Finalissima”-s së planifikuar në Katar dhe vazhdojnë një trend të viteve të fundit, ku Argjentina është përballur kryesisht me ekipe më pak konkurruese si Panama, Kuraçao, Indonezia apo Guatemala. Në fakt, gjatë katër viteve të fundit, kundërshtari më i fortë në miqësore ka qenë Australia.
Ndryshe nga Argjentina, skuadra si Brazili dhe Kolumbia kanë zhvilluar disa ndeshje ndaj ekipeve të renditura në top 20 të FIFA-s. Trajneri Lionel Scaloni e ka justifikuar këtë situatë me mungesën e mundësive për t’u përballur me skuadra evropiane për shkak të Ligës së Kombeve, megjithëse vende të tjera kanë arritur të organizojnë ndeshje të tilla.
Përtej aspektit sportiv, një faktor i rëndësishëm mbetet ai financiar. Federata Argjentinase ka përfituar shuma të konsiderueshme nga organizimi i këtyre miqësoreve, me vende pritëse si Angola që kanë paguar miliona euro për të sjellë kampionët e botës. Njëkohësisht, ndeshjet janë zhvilluar shpesh në tregje strategjike si SHBA dhe Azia për të rritur të ardhurat dhe partneritetet komerciale.
Kjo strategji ka ndikuar edhe në renditjen e FIFA-s, ku Argjentina ka siguruar fitore të shumta dhe pozicion të lartë. Megjithatë, kritikat nga tifozët janë shtuar, duke kërkuar përballje me kundërshtarë më të fortë përpara Kupës së Botës 2026, e cila mbetet testi i vërtetë për “Albiceleste”.
The post Argjentina zgjedh kundërshtarë modestë në miqësore, kritika për strategjinë para Botërorit appeared first on Euronews Albania.
