Lexoje këtu nëse e ke me ngut!
Serena Williams është përfshirë papritur në një polemikë për disa foto dhe video të postuara në rrjetet sociale. Ish-tenistja amerikane është akuzuar nga disa përdorues se ka zbardhur lëkurën e saj. Williams, e cila zakonisht nuk i kushton rëndësi komenteve negative, ka reaguar me forcë dhe ka mohuar kategorikisht se ka filluar të zbardhë lëkurën, duke sqaruar se për pamjen e saj kishte një arsye të thjeshtë që lidhej me make-up-in.
“Për ju urryes, nuk po e zbardh lëkurën time”
Ish-numri 1 i renditjes botërore të WTA-së, dhe fituese e 23 titujve Grand Slam, u irritua kur pa komentet në një video që u bë virale. Komentet ishin të ashpra dhe të pavend, duke e akuzuar për zbardhjen e lëkurës. Por kjo nuk ishte e vërtetë. Në një transmetim të drejtpërdrejtë në Instagram, Serena shpjegoi situatën ndërsa ilustronte rutinën e saj të bukurisë:
“Për ju urryes atje jashtë, nuk e zbardh lëkurën time. Ekziston diçka që quhet dritë dielli, dhe në atë dritë, lëkura merr ngjyra të ndryshme. Më duket qesharake që kaq shumë njerëz thonë: ‘Oh, po zbardh lëkurën.’ Jam një grua e zezë me ngjyrë të errët dhe e dua veten, e dua pamjen time. Kjo nuk është për mua.”
Make-up i skenës dhe drita: arsyeja e polemikave
Tenistja, e cila ka fituar shtatë herë turneun e Wimbledon-it, sqaroi se kur ishte filmuar dhe fotografuar, kishte përdorur një ‘make-up skene’, që i nevojitej për të ndihmuar vajzën e saj dhe shokët e klasës në një shfaqje shkollore. Pasi mohoi kategorikisht akuzat, Serena shpjegoi se kjo ishte arsyeja pse në ato imazhe ngjyra e saj dukej ndryshe. Me ironi, ajo shtoi se drita e reflektuar nga letra e artë në banjën e saj e bënte të dukej më e çelur: “Më jep më shumë nga ngjyra ime e vërtetë. Ngjyra që kurrë nuk e kam zbardhur”.
Serena Williams Addresses Rumors: “I Do Not Bleach My Skin, This Is My Natural Color” pic.twitter.com/Pum52mRdks
— CelebRapInsider (@CelebRapInsider) December 3, 2024
“Nuk kam menduar kurrë: do të doja të isha me një ngjyrë tjetër”
Ata që e kritikuan, duke bërë një gabim të madh, duket se e njohin shumë pak Serena Williams. Ajo ka qenë gjithmonë në vijën e parë të betejave sociale dhe krenare për atë që është. Një shembull i thjeshtë është angazhimi i saj për lëvizjen Black Lives Matter, e cila u përhap në mbarë botën pas vdekjes së George Floyd në 2020. Serena fliste dhe vepronte në mbështetje të kësaj lëvizjeje që në vitin 2016, kur ishte ende në majat e karrierës.
Në një intervistë të dhënë disa vite më parë, ajo tha: “Kam përjetuar padrejtësi të tmerrshme për shkak të racizmit; më kanë testuar për doping më shumë se të tjerët, kam fituar më pak se kolegët e mi meshkuj dhe koleget e mia të bardha. Por nuk kam menduar kurrë: do të doja të isha me një ngjyrë tjetër. Më pëlqen kush jam, më pëlqen vetja, dhe jam krenare që përfaqësoj bukurinë e grave me ngjyrë të errët. Për mua, kjo është perfekte. Nuk do të doja të isha ndryshe.”
The post E bardhë si Michael Jackson: Serena Williams akuzohet se po zbardh lëkurën appeared first on Lapsi.al.
