Lexoje këtu nëse e ke me ngut!
Ushtria izraelite u ka thënë palestinezëve se evakuimi i qytetit të Gazës është “i pashmangshëm”, pasi forcat e saj po përgatiten ta pushtojnë atë.
Në një postim në X të mërkurën, zëdhënësi arab i ushtrisë, Avichay Adraee, tha se familjet që zhvendosen drejt jugut do të “marrin ndihmën humanitare më bujare”.
Tanket izraelite u futën gjatë natës në një zonë të re të qytetit të Gazës, duke detyruar më shumë banorë të largohen, thanë dëshmitarë. Mijëra persona tashmë janë zhvendosur për shkak të avancimeve të fundit izraelite, kryesisht në pjesë të tjera të qytetit, ku ende jetojnë rreth një milion palestinezë.
Thirrja për evakuim vjen ndërsa presidenti amerikan Donald Trump pritet të kryesojë një takim në Shtëpinë e Bardhë mbi vizionin e pasluftës për Gazën.
Në fillim të gushtit, Izraeli njoftoi planet për të pushtuar të gjithë Rripin e Gazës – përfshirë qytetin e Gazës, të cilin e përshkroi si bastionin e fundit të Hamasit.
OKB-ja dhe organizatat joqeveritare kanë paralajmëruar se një ofensivë izraelite në qytetin e Gazës do të kishte një “ndikim humanitar të tmerrshëm”.
Vonë të martën, tanket hynë në lagjen Ibad al-Rahman, në periferi veriore të qytetit, duke shkatërruar disa shtëpi, raportoi agjencia Reuters.
“Papritur, dëgjuam se tanket u futën në Ibad al-Rahman, shpërthimet u bënë gjithnjë e më të forta, dhe pamë njerëz që iknin drejt zonës sonë,” tha Saad Abed për Reuters në një mesazh nga shtëpia e tij në rrugën Jala, rreth 1 km larg.
Të mërkurën, tanket raportohet se u tërhoqën drejt Jabalia-s, një zonë më në veri ku ata kanë qenë të dislokuar.
Bombardimet gjithashtu vazhduan në lagjet Shejaiya, Zeitoun dhe Sabra të qytetit të Gazës.
Ushtria izraelite tha në një deklaratë të mërkurën se trupat e saj ishin përfshirë në luftime në zonën e Jabalia-s dhe në periferi të qytetit të Gazës, duke shtuar se kishin eliminuar një “qelizë terroriste” dhe kishin lokalizuar një depo armësh.
Kryeministri Benjamin Netanyahu shpalli synimin e Izraelit për të pushtuar të gjithë Rripin e Gazës pasi bisedimet indirekte me Hamasin për një armëpushim dhe marrëveshje për pengjet dështuan muajin e kaluar.
Por Netanyahu po përballet si me presion ndërkombëtar, ashtu edhe me presion të brendshëm.
Të martën në mbrëmje, dhjetëra mijëra protestues u mblodhën në Tel Aviv duke kërkuar një marrëveshje armëpushimi për të sjellë në shtëpi pengjet izraelite që mbahen nga Hamasi. Besohet se vetëm 20 nga 50 pengjet janë gjallë.
Në Uashington të martën, i dërguari special amerikan Steve Witkoff tha se Shtëpia e Bardhë po punonte për “një plan shumë gjithëpërfshirës” për Gazën pas luftës.
Ai i tha Fox News se plani “për ditën e nesërme” do të diskutohej në një “takim të madh në Shtëpinë e Bardhë” të kryesuar nga Trump të mërkurën.
Ai nuk dha detaje, por tha se priste që konflikti në Gaza të zgjidhej “një mënyrë ose një tjetër, sigurisht para fundit të këtij viti”.
Ushtria izraelite nisi fushatën në Gaza si përgjigje ndaj sulmit të udhëhequr nga Hamasi në jug të Izraelit më 7 tetor 2023, në të cilin u vranë rreth 1,200 njerëz dhe u morën peng 251 të tjerë.
Që atëherë, sipas ministrisë së shëndetësisë të kontrolluar nga Hamasi, gati 62,900 persona janë vrarë në Gaza.
Shumica e popullsisë së Gazës është zhvendosur disa herë; mbi 90% e banesave vlerësohet të jenë dëmtuar ose shkatërruar; sistemet e kujdesit shëndetësor, ujit, kanalizimeve dhe higjienës janë shembur; dhe ekspertët globalë të sigurisë ushqimore të mbështetur nga OKB-ja kanë konfirmuar se ka uri ekstreme (famine) në zonën e qytetit të Gazës./BBC
The post Ushtria izraelite thirrje palestinezëve të braktisin qytetin e Gazës appeared first on Lapsi.al.
