Operacioni i SPAK/ Zbardhet vrasja e Edmir Bregut, urdhër-arreste për Astrit Avdylajn dhe ‘Rrumin e Shijakut’ – Detajet

Një operacion i SPAK në bashkëpunim me Byronë Kombëtare të Hetimit (BKH) ka goditur dy grupe të strukturuara kriminale në rajonin e Durrësit. Aksioni i gjerë ka sjellë zbardhjen e një vrasjeje të rëndë dhe shkatërrimin e një skeme masive të tjetërsimit të pronave. Si pasojë, janë lëshuar urdhër-arreste për disa emra më të njohur të botës së krimit, përfshirë Astrit Avdylajn, kreun e bandës së Shijakut, dhe Aleksandër Lahon, i njohur si “Rrumi i Shijakut”.

Operacioni i SPAK, i kryer pas një hetimi intensiv në bashkëpunim me Europol, Eurojust dhe autoritete nga Franca, Belgjika, Holanda e Gjermania, ka identifikuar dhe goditur dy aktivitete kriminale paralele:

• Vrasja e Edmir Bregut: SPAK ka zbardhur ekzekutimin e ndodhur më 21 janar 2021 në Durrës. Sipas provave të administruara, porositës i këtij atentati për hakmarrje dyshohet të jetë Astrit Avdylaj, për shkak të një tentative vrasjeje ndaj nipit të tij. Si ekzekutorë dhe ndihmës dyshohen disa persona të tjerë, të cilët janë përfshirë në sigurimin e automjeteve, armëve dhe banesave për realizimin e krimit.
• Tjetërsimi i pronave publike: Një grup tjetër kriminal, i dyshuar si i drejtuar nga Aleksandër Laho, ka falsifikuar dokumente për të tjetërsuar në mënyrë të paligjshme 254,300 m² tokë publike në zonën bregdetare të fshatrave Lalëz dhe Shetaj. Ky grup krijonte akte tërësisht të falsifikuara, duke regjistruar pronat në emër të banorëve vendas pa dijeninë e tyre, me qëllim që më pas t’ua shisnin kompanive apo individëve të interesuar për investime. Në kuadër të këtij hetimi, SPAK ka sekuestruar në mënyrë preventive 11 pasuri.

Të akuzuarit

SPAK ka lëshuar në total 9 urdhër-arreste, 5 prej të cilëve janë ekzekutuar, ndërsa 4 persona janë ende në kërkim.

Të arrestuar:

• Vullnet Muça (vëllai i Aleksandër Lahos, ‘Rrumit të Shijakut’)
• Enea Kume (vëllai i deputetit të PS, Loer Kume)
• Vlash Draçi
• Aldo Avdylaj (në kërkim)

Personat në kërkim:

• Aleksandër Laho
• Astrit Avdylaj (i cili ndodhet në burg nga operacioni “Revanshi”)
• Të tjerë persona të dyshuar si të përfshirë në grupet kriminale.

Historia kriminale 

Astrit Avdylaj, kreu i bandës së Shijakut, tashmë në qeli nga operacioni “Revanshi”, akuzohet edhe si porositës i vrasjes së Edmir Bregut. Nga zbardhja e komunikimeve në aplikacionin “Sky ECC”, ai dyshohet se ka bashkëpunuar me figura të tjera të njohura të botës së krimit për të kryer vrasje me pagesë dhe ka qenë i përfshirë në një sërë ngjarjesh kriminale që nga vitet ’90.

Aleksandër Laho, i njohur si “Rrumi i Shijakut”, është një personazh me precedentë të shumtë penalë. Ai rezulton i dënuar për tjetërsimin e 45 mijë m² tokë në Gjirin e Lalzit dhe akuzohet për korrupsion aktiv. Laho ishte dënuar me 3 vjet burg për këtë çështje, por dënimi u ul në 2 vjet për shkak të gjykimit të shkurtuar. Ai gjithashtu ishte në kërkim për një pengmarrje të dy vëllezërve Beqiraj.

I arrestuar edhe vëllai i depuetit të PS

Në një reagim publik, deputeti i PS-së, Loer Kume, konfirmoi arrestimin e vëllait të tij, Enea Kume. Ai theksoi se për sa kohë nuk ka një vendim fajësie, vëllai i tij do të konsiderohet i pafajshëm. “Gjithkush është përgjegjës për jetën dhe vendimet që merr”, u shpreh deputeti, duke u distancuar nga veprimet e të vëllait.

Operacioni i fundit i SPAK, me ndihmën e partnerëve ndërkombëtarë, konfirmon vendosmërinë e Prokurorisë së Posaçme për të goditur pa kompromis krimin e organizuar dhe korrupsionin, duke sjellë para drejtësisë figura të njohura të botës së krimit.