Anëtarë e një bande kriminale shqiptare janë arrestuar në shtretërit e tyre gjatë një operacioni policor në orët e para të mëngjesit, pas një serie bastisjesh të koordinuara në Mbretërinë e Bashkuar.
Pamjet filmike dhe videot nga kamerat trupore të policisë tregojnë momentin kur efektivët hyjnë me forcë në banesa dhe u vënë prangat të dyshuarve, të cilët po flinin në momentin e arrestimit. Më pas, ata janë shoqëruar me automjete policore.
Sipas autoriteteve britanike, banda dyshohet se ka kryer mbi 40 vjedhje me thyerje me vlerë të lartë në zona të ndryshme të Mbretërisë së Bashkuar.
Pesë shtetas shqiptarë dhe një grua britanike kanë pranuar fajësinë për rolin e tyre në këtë aktivitet kriminal. Të pandehurit janë:
Endrit Nikolli, 27 vjeç, Kristian Gropcaj, 30 vjeç, George Lleshaj, 31 vjeç, Krisjian Dedndreaj, 28 vjeç dhe Sidorjan Lleshi, 26 vjeç.
Ata akuzohen për vjedhje me thyerje dhe posedim të pasurisë kriminale ndërsa seancat dëgjimore u zhvilluan në Gjykatën e Kurorës në Chester më 28 nëntor dhe më 7 janar.
Nikolli dhe Lleshi po ashtu kanë akuza për vjedhje me thyerje, lidhur me dy raste të ndodhura në Staffordshire në mars 2024 dhe dhjetor 2023.
Ndërkohë, Jade Tubb, 33 vjeçe, shtetase britanike, u deklarua fajtore për konspiracion për posedim të pasurisë kriminale.
Sipas Policisë së Cheshire, hetimi – i njohur si Operacioni “Ambler” – nisi në tetor 2024, pas një serie vjedhjesh në lindje të Cheshire. Banda përdorte shkallë për të hyrë në banesa përmes dritareve ose ballkoneve, duke vjedhur sende me vlerë të lartë përpara se të largohej me shpejtësi.
Falë bashkëpunimit me policitë e Derbyshire, Nottinghamshire dhe Staffordshire, autoritetet arritën ta lidhin grupin me krime të shumta përmes gjurmëve të këpucëve, analizës së targave (ANPR) dhe të dhënave të telekomunikacionit.
Pas muajsh hetimesh, policia kreu bastisje të njëkohshme, duke çmontuar rrjetin kriminal. Hetimet kanë zbuluar se banda ishte përgjegjëse për të paktën 44 vjedhje me thyerje, përfshirë tetë në Cheshire, me një vlerë totale të sendeve të vjedhura që tejkalon 1 milion paund.
Rreshterja Detektive Laura Fox deklaroi se banda vepronte në mënyrë të organizuar, duke përzgjedhur objektiva të pasura dhe duke vendosur madje objektiva javore për sasinë e arit që synonin të vidhnin. Gjatë kontrolleve, policia gjeti edhe letra mes Nikollit dhe Tubbit, ku ata e përshkruanin veten si “Bonnie dhe Clyde”.
Sipas autoriteteve, të pandehurit nuk kanë treguar asnjë ndjeshmëri për pasojat që veprimet e tyre kishin ndaj viktimave, ndërsa shpesh mburreshin me fitimet e paligjshme.
Inspektori Detektiv David Jarvis theksoi se ky rast duhet të shërbejë si paralajmërim:
“Çdokush që kryen krime në Cheshire do të kapet dhe do të përballet me drejtësinë.”
The post VIDEO+FOTO/ Policia britanike çmonton grupin e grabitësve shqiptarë appeared first on Euronews Albania.
