Një gazetar turk për transmetuesin publik gjerman Deutsche Welle (DW), Alican Uludag, u arrestua në Ankara të enjten nën akuzat për “përhapje lajmesh të rreme” dhe “fyerje të Presidentit” Recep Tayyip Erdogan.
Në deklaratën e saj, zyra e prokurorit tha se po kryente një hetim për fyerje të Presidentit të Republikës dhe përhapje lajmesh mashtruese në internet kundër gazetarit, duke vënë në dukje se hetimi u nxit nga mesazhet e postuara në llogarinë e tij në rrjetin social X.
Megjithatë, sipas një avokati që e përfaqëson Uludag, ai po përballet me akuza për një artikull që ai botoi në faqen e internetit të DW në lidhje me riatdhesimin e qytetarëve turq që dyshohet se kanë luftuar në radhët e organizatës xhihadiste të Shtetit Islamik.
“Alican Uludag u arrestua për artikullin e tij të titulluar ‘Turqia po përgatitet të riatdhesojë qytetarët turq që i përkasin Shtetit Islamik (organizatës)’”, tha Tora Pekin, një avokate.
Sipas Deutsche Welle, akuzat kanë të bëjnë gjithashtu me një mesazh nëpërmjet X nga rreth një vit e gjysmë më parë, në të cilin gazetari kritikoi masat e marra nga qeveria turke që mund të kenë çuar në lirimin e terroristëve të ISIS dhe akuzoi qeverinë për korrupsion.
DW raportoi se gazetari u arrestua para anëtarëve të familjes së tij nga rreth tridhjetë oficerë policie, ndërsa shtëpia e tij u kontrollua dhe pajisjet kompjuterike u konfiskuan. Sipas avokatit të tij, ai po udhëtonte nga Ankaraja për në Stamboll mbrëmë dhe pritet të paraqitet para zyrës së prokurorit sot.
The post Akuza për fyerje dhe lajme të rreme ndaj Erdogan, arrestohet gazetari turk në Stamboll appeared first on Euronews Albania.
