Për tre net me radhë në skenën e TKOB do të ngjitet në skenë “Lola”, një balet për dashurinë, tradhtinë dhe hakmarrjen.
Pas 25 vitesh kjo shfaqje rivendoset në skenë nga Anisa Gjoni, Domenica Ndreca dhe Edi Blloshmi.
“Vjen në një produksion të re, skenografi të re, të sjellësh një balet pas kaq vitesh është nostalgji, dhe kanë kërcyer artistë të mëdhenj. Është kënaqësi të sjellësh një vepër aq të bukur në një dimension të ri”, thotë Blloshmi.
Në sfondin e luftës së popullit spanjoll kundër pushtimit francez, shpaloset historia e Lolës, një vajzë e bukur, e fortë dhe e përfshirë në vorbullën e ndjenjave dhe sakrificës.
“Është Lola, fuqia e gruas, kurajë, është bërë një grua e fortë. Do vij në dy kaste, në kastin e parë kemi Adela Muçollari si Lola, është një kast shumë i fuqishëm”, tregon ai.
Me muzikë nga Sergei Vasilenko dhe një gjuhë koreografike të fuqishme, “Lola” vjen si një balet dramatik, ku pasioni i dashurisë përplaset me flakën e luftës dhe një grua bëhet figura qendrore e rezistencës.
“Është një shfaqje që ka dashurinë mes karaktereve, është dashuri që përçan çdo gjë dhe ka lojën, motivet spanjolle, jemi në Spanjë, ka larmi, kemi korin, kemi trupën e baletit, është një bashkëpunim gjigand që po e sjellim pas kaq shumë vitesh”, shprehet Blloshmi.
The post “Lola” ngjitet në skenë baleti për dashurinë, tradhtinë dhe hakmarrjen appeared first on Euronews Albania.
