Legjenda e futbollit francez, Michel Platini, i ftuar në emisionin “L’After Foot” të RMC me rastin e 20-vjetorit të tij, ndau kritika të forta për futbollin modern, veçanërisht për përdorimin e teknologjisë VAR.
Ish-presidenti i UEFA-s tha se VAR duhet të përdoret vetëm për pozicionin jashtë loje dhe situata shumë të vështira për t’u parë nga gjyqtarët. Sipas tij, përdorimi i shpeshtë i VAR për raste të topit me dorë po ndryshon rregullat e arbitrimit dhe po krijon konfuzion në lojë.
Platini gjithashtu u shpreh i shqetësuar për ndryshimet në stilin e futbollit, duke thënë se sot ka më pak lojtarë kreativë si Lionel Messi, Luka Modric apo Andres Iniesta dhe më shumë futbollistë “stereotipikë”. Ai kritikoi edhe ndikimin e vendimit Bosman, që sipas tij ka dëmtuar identitetin e klubeve dhe lidhjen mes lojtarëve dhe tifozëve.
Duke folur për kombëtaren franceze, ai vlerësoi trajnerin Didier Deschamps për sukseset e arritura, ndërsa theksoi se për një trajner gjëja më e rëndësishme është fitorja, jo domosdoshmërisht loja e bukur.
Platini nuk kurseu kritikat edhe për presidentin e FIFA-s, Gianni Infantino, duke thënë se ai është një administrator i mirë, por jo një lider karizmatik.
Në fund, ish-fituesi i tre “Topave të Artë” u ndal edhe te çështja gjyqësore që zgjati rreth dhjetë vite dhe nga e cila u shpall i pafajshëm në vitin 2025. Ai deklaroi se ndihet i braktisur nga Federata Franceze e Futbollit dhe nga shteti francez, ndërsa paralajmëroi se do të vazhdojë betejën ligjore kundër atyre që e akuzuan padrejtësisht.
The post Platini kritikon VAR-in dhe futbollin modern: Ka humbur liria dhe identiteti appeared first on Euronews Albania.
