Kolektivi për Mendim dhe Veprim Feminist ka reaguar me rastin e Dita Ndërkombëtare e Punës, duke theksuar se këtë ditë e kanë nisur me një bllokadë simbolike në rrugë për të, siç thanë, “kumtuar të vërtetën e klasës punëtore”.
Sipas deklaratës së tyre, punëtorët në Kosovë po përballen me kushte gjithnjë e më të vështira jetese, përfshirë paga të ulëta, mungesë sigurie sociale, çmime të larta dhe, siç pretendojnë, shpërfillje nga institucionet dhe shfrytëzim nga sektori publik dhe privat.
Në reagim theksohet se kategori të ndryshme shoqërore, përfshirë gratë, punëtorët e sektorit privat, pensionistët dhe grupet e margjinalizuara, përballen me forma të ndryshme të padrejtësive dhe përjashtimit.
Kolektivi vlerëson se ekonomia po zhvillohet në dëm të shumicës së qytetarëve, ndërsa përfitimet, sipas tyre, po përqendrohen tek një pakicë.
Po ashtu, ata njoftuan se protesta e paralajmëruar është suspenduar si grumbullim simbolik, duke e cilësuar këtë si një moment reflektimi për të rikthyer, sipas tyre, fuqinë reale të protestës dhe organizimit të klasës punëtore.
Në fund, Kolektivi për Mendim dhe Veprim Feminist bëri thirrje për bashkim dhe organizim të punëtorëve, duke theksuar se ndryshimi mund të vijë vetëm përmes veprimit të përbashkët.
The post Dita e punës nis me bllokadë simbolike në rrugë appeared first on Euronews Albania.
