Në anijen MV “Hantius” situata vijon të jetë nën monitorim të vazhdueshëm pas rasteve të raportuara me hantavirus, një virus që mund të shkaktojë infeksione të rënda te njerëzit. Autoritetet dhe ekuipazhi po ndjekin protokollet e sigurisë dhe shëndetit në bord.
Dy pasagjerë francezë, Julia dhe Roland, të cilët janë pjesë e udhëtimit, kanë reaguar publikisht duke hedhur poshtë raportimet për panik në anije. Ata thonë se gjendja në bord është e qetë dhe se nuk ka arsye për alarm të shtuar.
Sipas tyre, deri tani nuk janë konfirmuar raste të reja të infektimit, megjithëse disa persona vijojnë të mbahen nën vëzhgim mjekësor si raste të dyshuara. Ata theksojnë se gjendja shëndetësore e pasagjerëve të tjerë dhe e ekuipazhit mbetet e qëndrueshme.
Megjithatë, raportimet zyrtare bëjnë me dije se në bord janë regjistruar disa viktima dhe disa persona të infektuar, të cilët janë transportuar për trajtim mjekësor në tokë.
Në anije janë vendosur masa të rrepta sigurie, përfshirë kufizim të lëvizjes, komunikim në grupe të vogla dhe përdorim të detyrueshëm të maskave në ambientet e përbashkëta. Autoritetet shëndetësore franceze janë gjithashtu në kontakt të vazhdueshëm me shtetasit e tyre në bord.
Anija MV “Hantius” ishte nisur nga Ushuaia më 1 prill me destinacion Kepin e Gjelbër dhe aktualisht po lundron drejt Tenerife-s, ku pritet të kryhet evakuimi i pasagjerëve të mbetur dhe vlerësimi i plotë i situatës epidemiologjike.
The post Çifti francez në anijen “me hanatvirus”: Nuk ka panik, gjendja është nën kontroll appeared first on Euronews Albania.
