Atletja amerikane dhe medalistja olimpike Jenny Simpson, 39 vjeç, është rrëzuar gjatë një gare të zhvilluar në Raleigh të Karolinës së Veriut, duke shkaktuar një ndërhyrje urgjente mjekësore në vendngjarje.
Sipas informacioneve, pas rrëzimit, personeli mjekësor ka konstatuar se atletja nuk kishte puls, duke u detyruar të përdorte një defibrilator për ta stabilizuar gjendjen e saj. Më pas, Simpson është transportuar me urgjencë në spital për trajtim të mëtejshëm.
Organizatorët e garës, Sir Walter Running, konfirmuan incidentin përmes një deklarate zyrtare, duke theksuar ndërhyrjen e menjëhershme të ekipeve mjekësore dhe profesionalizmin e tyre në menaxhimin e situatës.
“Jemi shumë mirënjohës për të gjithë personelin mjekësor që reagoi menjëherë dhe e trajtoi situatën me kujdes, urgjencë dhe profesionalizëm. Jenny po merr kujdes mjekësor dhe mendimet tona janë me të dhe familjen e saj në këtë kohë,” thuhet në deklaratë.
Jenny Simpson është një nga figurat më të njohura të atletikës amerikane, kampione bote në 1500 metra në vitin 2011. Ajo ka fituar gjithashtu dy medalje argjendi në Kampionatet Botërore (2013 dhe 2017) dhe një medalje bronzi olimpike në vitin 2016. Gjatë karrierës së saj, ajo është shpallur shtatë herë kampione kombëtare në disiplina nga 1500 deri në 3000 metra me pengesa, përpara se të tërhiqej nga garat pas sezonit 2024.
The post Atletja amerikane Jenny Simpson rrëzohet gjatë garës në Raleigh, i nevojitet defibrilator për t’u stabilizuar appeared first on Euronews Albania.
