32 persona, përfshirë ish-drejtorin ekzekutiv të operatorit të autostradave të Italisë, janë dënuar për shembjen e një ure në Gjenova në vitin 2018, në të cilën humbën jetën 43 persona. Giovanni Castellucci, ish-drejtori i Autostrade per l’Italia, u dënua me 12 vjet burg, dënimi më i lartë në këtë rast.
Ai kishte qenë në gjyq së bashku me 56 të tjerë për shembjen e Urës Morandi ku disa automjete ranë në një shtrat lumi poshtë mbikalimit gjatë një stuhie verore.
Castellucci u dënua për bashkëpunim në akuza të shumta për vrasje nga pakujdesia. Avokatët e tij thanë se ai do të apelonte, duke thënë se si drejtor ekzekutiv, klienti i tyre ishte mbështetur te inxhinierët kryesorë të Italisë. Ata e quajtën vendimin “një humbje për të vërtetën”.
Të gjithë të pandehurit kishin mohuar shkeljet. Në total, 32 persona u dënuan dhe iu dhanë dënime që varionin nga një vit e 11 muaj deri në 12 vjet. Të tjerë ose u shpallën të pafajshëm, ose akuzat më të lehta kishin skaduar sipas statutit të parashkrimit.
Prokurorët argumentuan se vite të tëra mirëmbajtjeje të neglizhuar, shenja paralajmëruese të injoruara dhe vonesa të përsëritura në punimet e sigurisë kontribuan në shembje, duke pretenduar se riparimet thelbësore u shtynë ndërsa operatori i autostradës vazhdoi të gjeneronte dhe shpërndante fitime.
Katastrofa shkaktoi gjithashtu një betejë politike mbi kontrollin e rrjetit autostradal të Italisë, duke përfunduar me heqjen dorë nga familja Benetton nga aksionet e saj kontrolluese në Autostrade per l’Italia.
The post 43 persona humbën jetën ngas shembja e urës në Gjenova, ish-drejtori i autostradave italiane dënohet me 12 vite burg appeared first on Euronews Albania.
