Kryeministri i Spanjës, Pedro Sánchez, ka deklaruar se 12 orët e ardhshme do të jenë vendimtare për të siguruar përparimin e bërë në luftën kundër zjarreve masive që kanë prekur disa zona të vendit.
Gjatë një vizite në një qendër komanduese në Navalcarnero, Sánchez tha se situata aktuale mbetet “e favorshme”, por rritja e temperaturave sjell rreziqe të reja dhe kërkon kujdes maksimal nga ekipet e emergjencës.
Ai vlerësoi punën e zjarrfikësve dhe theksoi se objektivi kryesor është forcimi i kontrollit mbi vatrat aktive dhe parandalimi i përhapjes së mëtejshme të flakëve.
Kryeministri spanjoll iu drejtua edhe banorëve të zhvendosur nga zonat e prekura, duke kërkuar besim dhe durim përpara rikthimit në banesat e tyre. Sánchez sqaroi se vendimet për kthimin nuk merren për arsye politike, por bazohen në vlerësime shkencore dhe të sigurisë.
Ai përsëriti gjithashtu thirrjen për qytetarët që të mos besojnë lajmet e rreme dhe teoritë konspirative që po përhapen në rrjetet sociale gjatë situatës së emergjencës.
The post Spanja në luftë me zjarret, kryeministri Sánchez: 12 orët e ardhshme vendimtare appeared first on Euronews Albania.
