E ardhmja e Vinicius Junior duket se do të mbetet në “Santiago Bernabéu”, pavarësisht spekulimeve të ditëve të fundit që e lidhnin me një transferim të mundshëm te Arsenali.
Sipas raportimeve të The Telegraph, klubi londinez ishte i gatshëm ta bënte sulmuesin brazilian lojtarin më të paguar në historinë e tij, nëse ai nuk do të rinovonte kontratën me Real Madridin, e cila skadon në vitin 2027.
Megjithatë, kjo mundësi është zbehur ndjeshëm. Mediat spanjolle raportuan se Real Madridi nuk kishte dijeni për ndonjë ofertë apo interes konkret nga Arsenali, ndërsa edhe përfaqësuesit e Vinicius nuk kishin marrë kontakte nga klubi anglez.
Ndërkohë, sipas Sky Sports, drejtuesit e Real Madridit janë të bindur se 26-vjeçari do të firmosë një kontratë të re dhe do të vazhdojë karrierën e tij me kampionët e Spanjës. Klubi nuk ka ndërmend ta shesë brazilianin dhe mbetet i fokusuar në arritjen e një marrëveshjeje për rinovimin e kontratës së tij.
Në këtë mënyrë, zërat për një kalim të Vinicius Junior në Premier League po humbasin forcë, ndërsa gjithçka tregon se sulmuesi do të vazhdojë të jetë një nga figurat kryesore të Real Madridit edhe në vitet e ardhshme.
The post Vinicius Junior drejt rinovimit me Real Madridin, zbehen spekulimet për Arsenalin appeared first on Euronews Albania.
