Kanë mbetur vetëm rreth 30 minuta deri në nisjen e seancës në Hagë, ku Dhomat e Specializuara pritet të shpallin aktgjykimin e shkallës së parë ndaj katër ish-drejtuesve të UÇK-së, Hashim Thaçi, Kadri Veseli, Rexhep Selimi dhe Jakup Krasniqi.
Seanca është caktuar të nisë në orën 10:00, ndërsa transmetimi për publikun në gjuhët shqipe, angleze dhe serbe do të jetë me një vonesë prej rreth 10 minutash. Për rrjedhojë, publiku pritet ta ndjekë drejtpërdrejt seancën nga rreth ora 10:10.
Sipas rendit të shpalljes, fillimisht pritet të lexohet aktgjykimi për Hashim Thaçin, më pas për Kadri Veselin, Rexhep Selimin dhe në fund për Jakup Krasniqin. Për secilin prej tyre gjykata do të shqyrtojë në mënyrë individuale përgjegjësinë për akuzat e ngritura në këtë proces.
Katër të akuzuarit janë deklaruar të pafajshëm ndaj 10 akuzave për krime lufte dhe krime kundër njerëzimit. Prokuroria ka kërkuar nga gjykata dënime me nga 45 vjet burgim për secilin, por kjo është kërkesë e akuzës dhe nuk përbën vendim të gjykatës.
Pritje në Hagë dhe Prishtinë
Ndërsa minutat deri në nisjen e seancës po kalojnë, vëmendja është përqendruar në dy pika kryesore: Hagë dhe Prishtinë.
Pranë selisë së Dhomave të Specializuara në Hagë kanë qëndruar gjatë natës qindra mbështetës nga Kosova dhe vende të ndryshme evropiane, në kuadër të aktivitetit “Nata e Pritjes”, të organizuar nga platforma “Liria ka Emër”.
Në Prishtinë, qytetarë janë mbledhur me flamuj të UÇK-së, fotografi të katër ish-drejtuesve dhe pankarta në mbështetje të tyre. Në sheshin “Skënderbeu” është vendosur një ekran i madh për ndjekjen e seancës.
Autoritetet kanë ndërmarrë gjithashtu masa të posaçme sigurie për shkak të grumbullimeve të paralajmëruara. Policia e Kosovës është koordinuar me KFOR-in, EULEX-in dhe përfaqësitë diplomatike ndërkombëtare.
Një proces me mijëra faqe provash
Aktgjykimi i sotëm vjen pas një procesi gjyqësor shumëvjeçar, gjatë të cilit janë dëgjuar rreth 270 dëshmitarë, janë administruar 5.467 prova materiale dhe janë krijuar më shumë se 29 mijë faqe transkriptesh.
Në planin juridik, gjykata do të vlerësojë nëse Prokuroria ka arritur të provojë përgjegjësinë penale individuale të secilit të akuzuar përtej çdo dyshimi të arsyeshëm.
Vendimi që pritet të shpallet sot është aktgjykimi i shkallës së parë. Procesi nuk përfundon domosdoshmërisht me shpalljen e tij, pasi palët kanë të drejtë të përdorin procedurat e apelimit sipas rregullave të Dhomave të Specializuara.
Kanë mbetur edhe rreth 30 minuta deri në nisjen e seancës që pritet të sjellë vendimin e parë gjyqësor në këtë çështje.
The post LIVE-“Liri për çlirimtarët”, 30 minuta nga aktgjykimi në Hagë, vëmendja te Thaçi, Veseli, Selimi dhe Krasniqi appeared first on Euronews Albania.
