Lexoje këtu nëse e ke me ngut!
Presidenti amerikan, Donald Trump e ka mirëpritur përgjigjen e Hamasit – grupit palestinez të shpallur terrorist nga Shtetet e Bashkuara dhe fuqi tjera – ndaj Planit të tij të Paqes në Lindje të Mesme, dhe i ka bërë thirrje Izraelit që “menjëherë t’i ndalë bombardimet në Gazë”.
“Bazuar në deklaratën e lëshuar nga Hamasi, besoj se ata janë të gatshëm për PAQE të qëndrueshme”, ka thënë Trump në rrjetin e tij social Truth Social.
Presidenti ka deklaruar se Izraeli duhet t’i ndalë menjëherë bombardimet në Gazë, për të mundësuar lirimin e pengjeve.
Hamasi ka thënë përmes një deklarate se është pajtuar me pjesën më të madhe të planit të Trumpit për t’i dhënë fund luftës, përfshirë lirimin e të gjitha pengjeve, por që disa pika duhet negociuar në të ardhmen.
Grupi ka thënë se është i gatshëm të përfshihet menjëherë në negociata, përmes ndërmjetësuesve, për t’i diskutuar hollësitë.
Zyra e kryeministrit izraelit, Benjamin Netanyahu ka thënë se Izraeli është gati për të zbatuar “fazën e parë” të planit të Trumpit, si referencë për lirimin e pengjeve.
“Ne do të vazhdojmë të punojmë në bashkëpunim të plotë me presidentin dhe ekipin e tij për t’i dhënë fund luftës, në përputhje me parimet e Izraelit, të cilat korrespodojnë me vizionin e Trumpit për përfundim të luftës”, është thënë në deklaratë.
Megjithatë, aty nuk është përmendur kërkesa e Trumpit që Izraeli t’i ndalë sulmet në Rripin e Gazës.
Autoritetet palestineze kanë thënë të shtunën se Izraeli i ka vazhduar sulmet, pavarësisht thirrjes së Trumpit.
Propozimi të cilit i është referuar Hamasi është përpiluar nga ekipi i Trumpit, i ka 20 pika dhe në mesin e tyre përmendet armëpushimi i menjëhershëm, këmbimi i pengjeve të mbajtura nga Hamasi me të burgosurit palestinezë që mbahen në burgjet izraelite, tërheqjen graduale të ushtrisë izraelite nga Gaza dhe çarmatosjen e Hamasit.
Plani parasheh edhe qeverisjen e Gazës nga një qeveri trazitore, e përbërë nga palestinezë teknokratë, nën vëzhgimin e një trupi ndërkombëtar, në krye me Trumpin.
Sipas planit të Trumpit, Izraeli nuk guxon të aneksojë apo pushtojë Rripin e Gazës, ndërsa Hamasit nuk i lejohet të përfshihet në administrimin e Gazës në asnjë formë.
Në plan ka hollësi edhe për rindërtimin e Gazës së shkatërruar nga lufta pothuajse dyvjeçare.
The post Trump i kërkon Izraelit t’i ndalë bombardimet në Gazë, pasi Hamasi pajtohet t’i lirojë pengjet appeared first on GIJOTINA.
