Pas shpalljes së kandidatit për President nga LVV, Lidhja Demokratike e Kosovës ka reaguar ashpër duke theksuar se nuk sheh përpjekje serioze për zgjidhje.
LDK vlerëson se qasja e Lëvizjes Vetëvendosje! nuk reflekton një përpjekje serioze për ndërtimin e këtij konsensusi, por e trajton procesin si garë politike dhe jo si përpjekje për arritjen e një dakordimi politik.
“Një qasje e tillë nuk i shërben as frymës së Kushtetutës dhe as nevojës së vendit për stabilitet institucional”, thekson LDK.
Në reagimin e saj, LDK-ja thekson se ka besuar gjithmonë që procesi i zgjedhjes së Presidentit të Republikës së Kosovës duhet të zhvillohet me seriozitet të plotë, përgjegjësi institucionale dhe në frymën e konsensusit që kërkon Kushtetuta e Republikës së Kosovës.
Sipas LDK-së, takimet e deritanishme ndërmjet subjekteve politike kanë qenë konsultative, me qëllim gjetjen e një kandidati konsensual për këtë pozitë të rëndësishme shtetërore.
“Konsensusi nuk është garë politike dhe nuk mund të ndërtohet si proces ku njëra palë propozon emra, ndërsa të tjerat ftohen vetëm për t’i mbështetur ata. Konsensusi nënkupton një proces të përbashkët diskutimi dhe dakordimi për një figurë që përfaqëson unitetin institucional të vendit dhe gëzon besimin e gjerë parlamentar”, thuhet në reagim.
Sipas saj, mënyra se si është zhvilluar ky proces nga ana e LVV-së nuk krijon kushtet për zgjedhjen e Presidentit dhe nuk dëshmon qëllim të mirëfilltë për të arritur një marrëveshje të gjerë politike.
LDK shton se zgjedhja e Presidentit është një proces që kërkon maturi, përgjegjësi dhe vullnet të vërtetë për bashkëpunim ndërmjet subjekteve parlamentare.
Në përfundim, Lidhja Demokratike e Kosovës shpreh keqardhje që, për shkak të kësaj qasjeje të papërgjegjshme politike, vendi po shkon drejt kalimit të afateve kushtetuese dhe rrezikon të dërgohet në edhe një palë zgjedhje të reja, në vend që të arrihet stabiliteti institucional, të cilin qytetarët e presin dhe e meritojnë.
The post LDK kritikon LVV-në: Nuk ka përpjekje serioze për zgjedhjen e Presidentit appeared first on Euronews Albania.
