Kryebashkiaku i Marsejës ka deklaruar se nuk dëshiron që reperi amerikan Kanye West të performojë në qytetin e tij.
Reagimi vjen pasi artisti njoftoi një koncert më 11 qershor, që pritet të jetë koncerti i vetëm i planifikuar i tij në Francë.
Në një mesazh të publikuar në rrjetin social X, kryebashkiaku tha se refuzon që Marseja të bëhet “një vitrinë për ata që promovojnë urrejtje dhe nazizëm”, duke shtuar se West nuk është i mirëpritur në stadiumin Stade Velodrome, të cilin e quajti “tempulli i të jetuarit së bashku për të gjithë banorët e qytetit”.
Kundërshtimi ndaj koncertit nuk vjen vetëm nga autoritetet lokale pasi edhe organizata që përfaqëson institucionet hebraike në Francë ka shprehur shqetësim, duke theksuar se mirëpritja e një artisti që ka shprehur admirim për Adolf Hitler ngre “një pyetje të vërtetë morale”.
Reperi amerikan ka qenë në qendër të polemikave vitet e fundit për shkak të deklaratave të tij raciste dhe antisemite. Ai madje ka shpallur veten “nazist”, ka shitur bluza me simbolin nazist dhe ka publikuar një këngë të titulluar “Heil Hitler”.
Reperit i është anuluar viza nga Australia dhe është përballur me kërcënime për arrestim në Brazil.
Në janar të vitit 2026, artisti kërkoi falje në një letër të botuar në “The Wall Street Journal”, ku pranoi se kishte “humbur kontaktin me realitetin” dhe se sjellja e tij lidhej me çrregullimin bipolar.
Megjithatë, debati rreth koncertit të planifikuar në Marsejë vazhdon.
The post Kryebashkiaku i Marsejës kundër koncertit të Kanye West në francë: Nuk është i mirëpritur appeared first on Euronews Albania.
