Një përdhunues i cili infektoi qëllimisht 7 persona me HIV është dënuar me burgim të përjetshëm në Angli. Adam Hall, 43 vjeç i kishte shënjestruar në internet ose në bare në Newcastle personat midis viteve 2016 dhe 2023.
Hall u shpall fajtor për shkaktimin e lëndimeve të rënda trupore ndaj shtatë viktimave, katër prej të cilave i përdhunoi. Viktimat thanë se ishin dhunuar dhe kishin mbetur me trauma për gjithë jetën.
Policia e Northumbrias tha se më shumë viktima të dyshuara kishin dalë hapur që kur Hall u dënua, ndërsa një hetim tjetër është duke vazhduar.
Që nga diagnoza e tij në vitin 2010, profesionistët e shëndetit kishin qenë “tepër të shqetësuar” për sjelljen e Hall dhe e kishin paralajmëruar vazhdimisht për rrezikun që ai paraqiste për të tjerët.
Hall ishte i vetëdijshëm për nevojën për të marrë ilaçe dhe për të informuar partnerët seksualë për statusin e tij të HIV-it.
Ai pretendoi në mënyrë të rreme se i kishte bërë të dyja por në vend të kësaj zgjodhi të mos merrte ilaçe dhe qëllimisht shënjestroi persona të shumtë.
Në një deklaratë të lexuar në gjykatë, një nga burrat, i cili ishte 18 vjeç kur u përdhunua dhe u infektua nga Hall, tha se ishte dhunuar në mënyrën më të tmerrshme dhe çnjerëzore dhe se i kishte mbetur një traumë që e mbante çdo ditë.
Një tjetër e përshkroi Hallin si një grabitqar që e kishte mashtruar. Një burrë i tretë, i cili ishte 19 vjeç në kohën kur u infektua, tha se ishte lënduar në mënyrën më dashakeqe.
The post Abuzoi dhe infektoi me HIV 7 të rinj, dënohet me burgim të përjetshëm 43-vjeçari në Angli appeared first on Euronews Albania.
