Ndeshja e Ligës së Kampionëve mes Benficas dhe Realit të Madridit u ndërpre për disa minuta pasi një lojtar kundërshtar dyshohet se i bëri një fyerje raciste sulmuesit brazilian Vinicius Junior.
Takimi në Lisbonë, u ndërpre pesë minuta pas nisjes së pjesës së dytë, pak pasi Vinicius i dha epërsinë 1-0 ekipit mysafir në ndeshjen e parë të play-off-it të fazës eliminatore. Kamerat e kapën 25-vjeçarin duke i thënë gjyqtarit francez François Letexier se ishte shënjestruar nga një koment i bërë nga lojtari i Benficës, Gianluca Prestianni.
Prestianni mohoi të ketë bërë një sharje raciste, duke pretenduar se lojtari i Madridit “keqinterpretoi atë që mendoi se dëgjoi”. Ndeshja u ndërpre për 11 minuta në stadiumin Estadio da Luz.
Të dy trajnerët, Jose Mourinho i Benficës dhe Alvaro Arbeloa i Madridit, folën me lojtarin gjatë ndërprerjes.
Sipas raportimeve, disa lojtarë të Benficës nuk ishin të kënaqur me festimin e Viniciusit, i cili kërceu pranë flamurit të goditjes nga këndi pas golit, dhe disa prej tyre shkuan ta përballnin. Sulmuesi brazilian u ndëshkua me karton të verdhë për festimin.
Pas ankesës, Letexier reagoi duke kryqëzuar krahët para fytyrës, duke aktivizuar protokollin anti-racizëm të FIFA dhe duke ndërprerë ndeshjen.
Lojtarët e Real Madridit kërcënuan se do të largoheshin nga fusha ndërsa tensionet u rritën, por gjyqtari më pas lejoi rifillimin e takimit.
Vinicius ka qenë vazhdimisht objekt i racizmit gjatë ndeshjeve në Spanjë. Në një mesazh në Instagram pas ndeshjes, ai shkroi: “Asgjë që ndodhi sot këtu nuk ishte e re në jetën time dhe të familjes sime. Racistët janë, mbi të gjitha, frikacakë. Ata duhet t’i mbulojnë gojët me bluza për të treguar sa të dobët janë. Por ata kanë, nga ana e tyre, mbrojtjen e të tjerëve që, teorikisht, kanë detyrimin t’i ndëshkojnë.”
Ai e përshkroi protokollin e zbatuar nga gjyqtari si të paqartë dhe tha se nuk e kuptonte pse ishte ndëshkuar me karton të verdhë për festimin. “Nuk më pëlqen të jem në situata të tilla, aq më tepër pas një fitoreje të madhe kur titujt duhet të jenë për Real Madridin, por është e nevojshme”, tha ai.
Në një mesazh në Instagram, Prestianni deklaroi: “Dua të sqaroj se në asnjë moment nuk kam drejtuar fyerje raciste ndaj lojtarit Vinicius Junior, i cili për fat të keq e keqinterpretoi atë që mendoi se dëgjoi. Nuk kam qenë kurrë racist ndaj askujt dhe pendohem për kërcënimet që kam marrë nga lojtarët e Real Madridit.”
Ekipet do të përballen në Madrid për ndeshjen e kthimit, me skuadrën spanjolle që kryeson 1-0. Korrespondenti sportiv i Sky News, Rob Harris, tha se mund të ketë sanksione.
“Mund të ketë një ndalim për lojtarin, nëse shpallet fajtor për abuzim racist ndaj Viniciusit,” u shpreh ai.
Pas ndeshjes, shoku i skuadrës Trent Alexander-Arnold, ish-lojtar i Liverpool FC dhe përfaqësueses së Anglisë, tha për Amazon Prime Video: “Ajo që ndodhi sonte është një turp për futbollin. Ka lënë në hije performancën, sidomos pas një goli kaq të mrekullueshëm. Vini e ka përjetuar këtë disa herë gjatë karrierës së tij. Nuk ka vend për këtë as në futboll dhe as në shoqëri. Është e neveritshme.”
Duke folur pas ndeshjes, Mourinho pretendoi se Viniciusi dhe Prestianni i kishin thënë gjëra të ndryshme dhe shprehu bindjen se festimi i sulmuesit të Madridit kishte qenë mungesë respekti.
“I thashë atij, kur shënon një gol të tillë, thjesht feston dhe tërhiqesh,” tha ai për Amazon Prime. “Ata më thanë gjëra të ndryshme, por unë nuk besoj asnjërin. Dua të jem i pavarur.”
Ndërkohë, ish-mesfushori i Real Madridit, Clarence Seedorf, i cili ishte analist në ndeshje, deklaroi se Mourinho kishte bërë “një gabim të madh” me komentet e tij.
“Mendoj se ai bëri një gabim të madh duke justifikuar abuzimin racor. Nuk po them se ky ishte rasti sot, por ai përmendi diçka që shkon përtej kësaj ndeshjeje. Ne kurrë, kurrë nuk duhet të justifikojmë abuzimin racor,” u shpreh Seedorf.
The post Benfica–Real Madrid ndërpritet 11 minuta pas akuzave për fyerje raciste ndaj Vinicius Junior appeared first on Euronews Albania.
