Presidenti i Serbisë, Aleksandar Vuçiç, ka drejtuar akuza ndaj Malit të Zi pas arrestimit të ish-shefit të policisë së Beogradit, Veselin Miliq, i dyshuar për përfshirje në fshehjen e një vrasjeje të lidhur me botën e krimit.
Ndërsa opinioni publik në Serbi pret përgjigje lidhur me arrestimin dhe shkarkimin e një prej drejtuesve më të lartë të policisë në kryeqytet, Vuçiç ka zgjedhur të akuzojë Malin e Zi për “importimin” e klaneve kriminale në territorin serb.
Deklaratat e tij nuk janë komentuar deri më tani nga autoritetet zyrtare në Podgoricë. As qeveria malazeze dhe as Ministria e Brendshme e Malit të Zi nuk iu përgjigjën interesimit të mediave lidhur me akuzat e presidentit serb.
Ndërkohë, zëvendëskryetari i Komisionit për Siguri dhe Mbrojtje në Kuvendin e Malit të Zi, Nikola Zirojević, i cilësoi deklaratat e Vuçiç si të papërshtatshme.
“Nëse e pyetni Vuçiçin, të gjithë në Mal të Zi jemi serbë, vetëm kriminelët janë malazezë”, deklaroi ai, duke shtuar se pyetja kryesore mbetet pse Serbia shihet si territor i favorshëm për grupet kriminale.
Në qendër të skandalit ndodhet Veselin Miliq, i cili mbante një nga postet më të rëndësishme në Ministrinë e Brendshme serbe. Ai dyshohet se ka fshehur vrasjen e një personi të lidhur me grupet kriminale në Beograd.
Sipas prokurorisë, Miliq ka qenë në restorantin ku ndodhi vrasja, së bashku me dy persona të dyshuar si autorë të krimit. Hetuesit pretendojnë se ai e kishte telefonuar viktimën për ta bindur të shkonte në takim pa truprojat e tij.
Përveç Miliqit, janë arrestuar edhe tre efektivë policie, ndërsa trupi i viktimës ende nuk është gjetur. Në operacionet e kërkimit është përfshirë edhe ushtria serbe.
Një ditë pas arrestimit, Vuçiç foli publikisht për klanet kriminale malazeze, pa dhënë detaje konkrete për rolin e ish-shefit të policisë së Beogradit në këtë ngjarje.
“Na e vranë gjysmën e shtetit. Nuk janë Shkalari dhe Kavaçi pranë Beogradit, por ju na e importuat këtë të keqe këtu”, deklaroi presidenti serb.
Kavač Clan dhe Škaljari Clan janë dy grupet kriminale rivale nga Kotori i Malit të Zi, konflikti i të cilëve ka nisur që në vitin 2014 pas zhdukjes së një sasie kokaine në Valencia të Spanjës. Përplasjet mes tyre kanë shkaktuar mbi 70 viktima në Mal të Zi, Serbi dhe vende të tjera.
Gazetari investigativ serb, Vuk Cvijiç, vlerëson se grupet kriminale nuk mund të ndahen sipas kombësisë.
“Këto organizata janë të përziera dhe bashkëpunojnë mes tyre. Kriminelët nga Serbia dhe Mali i Zi kanë pasaporta të të dyja vendeve”, tha ai.
Edhe avokati dhe ish-ministri i Policisë serbe, Božo Prelević, e konsideron retorikën e Vuçiçit si përpjekje për të larguar vëmendjen nga skandali në Beograd.
Sipas tij, fakti që një vrasje e rëndë ka ndodhur në një restorant të frekuentuar nga zyrtarë policie dhe se në ngjarje dyshohet për përfshirje të efektivëve të MUP-it, është çështja reale që duhet të shqetësojë opinionin publik në Serbi.
Vuçiç ka përmendur gjithashtu emrin e Miloš Medenica, një person në arrati nga Mali i Zi, duke pretenduar se ai ka publikuar materiale në rrjetet sociale lidhur me vrasjen në Beograd.
Megjithatë, autoritetet malazeze nuk kanë konfirmuar pretendimet e presidentit serb, ndërsa më herët policia e Malit të Zi kishte deklaruar se videot e publikuara nga Medenica dyshohet se janë krijuar me inteligjencë artificiale.
Përplasjet politike mes Beogradit dhe Podgoricës vijnë edhe në prag të 20-vjetorit të pavarësisë së Malit të Zi. Vuçiç refuzoi të marrë pjesë në ceremonitë përkujtimore, duke bërë deklarata të ashpra ndaj shtetit fqinj.
Ministria e Jashtme e Malit të Zi i cilësoi komentet e tij si “politikisht të papërgjegjshme”.
The post Pse Vuçiç fajëson Malin e Zi pas arrestimit të shefit të policisë së Beogradit? appeared first on Euronews Albania.
