Lionel Messi nuk kishte shumë kohë në përpjekje për t’u bërë lojtari i parë që shënon gola në shtatë ndeshje radhazi në Kupë të Botës.
Superylli argjentinas megjithatë e arriti këtë. Ai hyri në minutën e 60-të në ndeshjen e Argjentinës ndaj Jordanisë, të dielën në mëngjes. Dhe shënoi nga goditja e dënimit në minutën e 80-të. Messi tani i ka 19 gola në Kupë të Botës, që është rekord. Ka tre gola më shumë se Kylian Mbappe, që po ashtu po shkëlqen, dhe se Miroslav Klose që mbante rekordin para kësaj Kupe të Botës.
Argjentina fitoi 3:1 ndaj Jordanisë në ndeshjen që ishte pa ngarkesë për Messin. Por ishte me shkëlqim.
Ishte goli i parë i Messit pasi mbushi 39 vjet. Messi tani i ka 72 gola nga goditjet e dënimit. 12 prej tyre i ka shënuar me Argjentinën.
Ka 123 gola në ndeshje ndërkombëtare. Është i dyti i të gjitha kohërave, pas Cristiano Ronaldos me 145 gola. Messi për Argjentinën e luajti ndeshjen e 202-të.
Para ndeshjes me Jordaninë, Messi, Just Fontaine i Francës dhe Jairzinho i Brazilit ishin të vetmit që kishin gola në gjashtë ndeshje rresht të Botërorit. Tani Messi është i vetmi me gola në shtatë ndeshje rresht.
“Unë e shoh atë që po e shihni ju. Po bëhet situatë e pakëndshme të përgjigjem, sepse nuk di çka të them më”, ka thënë për Messin selektori i Argjentinës, Lionel Scaloni.
Messi kishte shënuar nga goditja e dënimit edhe ndaj Nigerisë në Kupën e Botës 2014. Është në mesin e vetëm gjashtë lojtarëve që kanë shënuar dy gola nga goditjet e dënimit në Botëror. Pele, Rivellino, Teofilo Cubillas, Bernard Genghini dhe David Beckham janë në këtë mes.
“Jam shumë i lumtur për të, për momentin që po e përjeton”, tha Giovani Lo Celso, bashkëlojtar i Messit tek Argjentina. Ai po ashtu shënoi nga goditja e dënimit.
“E vërteta është që ta shohim atë çdo ditë na entuziazmon, na emocionon dhe na infekton shumë. Ta shohim atë në gjendjen që është, ka shumë rëndësi për ne”.
Messi nuk startoi pasi Argjentina e kishte të sigurt vendin e parë në Grupin J. Edhe Jordania ishte e eliminuar tashmë.
Por 70 mijë e 649 shikuesit në Dallas mezi prisnin ta shihnin.
Tifozët nisën të thërrasin emrin e Messit kur nisi pjesa e dytë. Dhe brohoritën me zë të lartë kur ai doli për të bërë ngrohjen.
Tifozëria u bë edhe më e zhurmshme kur ai hyri në fushë në vend të Lautaro Martinezit, që shënoi po ashtu gol. Messi asnjëherë nuk është shpallur golashënuesi më i mirë i Botërorit. Këtë herë është në rrugë të mbarë. Tani i ka gjashtë gola në tri ndeshje në Botërorin në SHBA, Kanada e Meksikë.
Por e pret garë e fortë. Me nga katër gola janë Kylian Mbappe, Vinicius Junior dhe Erling Haaland.
Argjentinasi kishte një lëndim në kofshë para Botërorit. Megjithatë u rikuperua me kohë dhe aktualisht është i pandalshëm.
“Ai do të mund të luante 90 minuta. Por dëshironte që shokët e skuadrës të kishin minuta dhe në të njëjtën kohë ta ruante veten për atë që vjen. Ai nuk mendon aq shumë për shifrat për të cilat flasin njerëzit”, ka thënë Scaloni.
The post Shifrat e pabesueshme të Messit appeared first on Euronews Albania.
