Presidenti i Shoqatës së Futbollit të Argjentinës vlerësoi Lionel Messin për performancat e tij në Kupën e Botës së fundit dhe theksoi se superylli 39-vjeçar është i vetmi që do të marrë vendimin se kur do të “varë këpucët e futbollit”.
“Është një vendim që është thjesht dhe personalisht i tij,” theksoi Claudio “Chiqui” Tapia dhe vazhdoi: “Duhet ta lini të qetësohet. Në vitin 2022, nuk e dinim nëse do të luante në vitin 2026. Ai tha se do ta merrte ndeshje pas ndeshjeje dhe mendoj se kemi parë një version të shkëlqyer – nëse jo më të mirin – të Leos në një Kupë Bote. Duhet ta lini të vazhdojë të shijojë futbollin dhe pas kësaj ai do të marrë vendimin që mendon se është i duhuri”.
“Pleshti”, i cili festoi ditëlindjen e 39-të më 24 qershor, dy ditë pasi shënoi dy herë në fitoren kundër Austrisë (2-0), si pjesë e grupit të 10-të të Kupës së Botës, nuk ka dhënë asnjë shenjë se kur mund të tërhiqet nga futbolli ndërkombëtar apo sa kohë synon të luajë për Inter Miamin në MLS.
Siç theksoi Tapia, prania e Messit në turneun e vitit 2026 nuk ishte e garantuar, pasi e kishte udhëhequr Argjentinën drejt titullit në vitin 2022 në Katar. Megjithatë, argjentinasi luajti disa nga ndeshjet e tij më të mira këtë verë, duke shënuar tetë gola dhe duke dhënë katër asiste për “albiceleste”.
Argjentina humbi 1-0 në kohën shtesë ndaj Spanjës në finalen e Kupës së Botës muajin e kaluar në Shtetet e Bashkuara. Messi u bë lojtari i parë që theu rekordin e Miroslav Klose prej 16 golash në një Kupë Bote . Në fund, superylli francez Kylian Mbappe e përfundoi turneun me 22 gola, duke e tejkaluar Messin me një.
“Ishte një Kupë Bote e shkëlqyer nga Leo”, vazhdoi Tapia, duke shtuar: “E shijuam shumë dhe duhet të ndihemi krenarë. E shijova çdo moment. Pa dyshim, ai ishte bartësi i flamurit të kësaj skuadre në Kupën e Botës. Nëse analizoni Kupën e Botës që ai pati, për mua ai ishte lojtari më i mirë. Ai po thyente rekorde ndeshje pas ndeshjeje”.
The post Argjentina: Vetëm Messi do të vendosë se kur do të dalë në pension appeared first on Euronews Albania.
