Vllaznia është shpallur kampione e Shqipërisë për sezonin 2025-2026 në kampionatin e futbollit të vajzave, pasi mposhti Apoloninë me rezultatin 2-0 në finalen e luajtur pasditen e kësaj të premteje në stadiumin “Selman Stërmasi”.
Skuadra shkodrane konfirmoi edhe një herë dominimin në futbollin e femrave, duke siguruar titullin e 13-të radhazi kampion. Finalja nisi me ritëm të lartë dhe raste nga të dyja skuadrat, por ishte kapitenia Megi Doçi ajo që zhbllokoi sfidën në pjesën e parë, duke i dhënë avantazhin Vllaznisë pas një 45-minutëshi të luftuar.
Në pjesën e dytë, Apolonia provoi të rikthehej në lojë dhe të gjente golin e barazimit, por vajzat kuqeblu administruan mirë rezultatin. Në minutën e 81-të, Teresa Deda realizoi golin e dytë, duke vulosur fitoren dhe titullin kampion për ekipin shkodran.
Pas përfundimit të takimit u zhvillua ceremonia e dorëzimit të medaljeve dhe trofeut ku Zëvendëspresidenti i FSHF-së, Lutfi Nuri, si dhe anëtarja e Komitetit Ekzekutiv të FSHF-së, Anila Basha, i dorëzuan medaljet dhe kupën ekipit kampion.
Falë rritjes së koeficientit të Shqipërisë në UEFA, futbolli i femrave shqiptar do të përfaqësohet këtë sezon me dy skuadra në UEFA Women’s Champions League.
Vllaznia, si kampione e vendit, do të garojë në “Champions Path”, ndërsa Apolonia, e renditur në vendin e dytë, do të marrë pjesë në “League Path” ndërsa të dyja ekipet do ta nisin aventurën europiane nga raundi i dytë kualifikues.
The post Vllaznia kampione për herë të 13-të radhazi, mposht Apoloninë në finalen e vajzave appeared first on Euronews Albania.
