Pak para takimit me kryetarin e LDK-së, Lumir Abdixhiku, kreu i LVV-së, Albin Kurti tha se shkon me vullnet të mirë për marrëveshje që sjellë bashkëqeverisje, raporton KosovaPress.
I pyetur nga gazetarët lidhur me takimin e sotëm, lideri i LVV-së, Albin Kurti tha se synimi është të bëhet konstituimi i institucioneve të legjislaturës së 11-të.
“Synimi ynë është që të bëhet konstituimi i institucioneve të legjislaturës së 11-të. Fatkeqësisht, dy partitë e tjera nuk e konsideruan të nevojshme apo të arsyeshme që të takohemi. Unë mendoj ndryshe”, tha Kurti.
Këto komente Kurti i bëri gjatë vizitës tek ndërtimi i urës së tretë mbi lumin Ibër.
Kurti u shpreh se do të jenë pjesë e takimit dhe dëshirojnë të konstituohet sa më parë Kuvendi dhe të zgjidhet Qeveria.
Ai shtoi se do të shkoj sot në takim me vullnet të mirë dhe me gatishmëri për marrëveshje.
“Unë shkoj me vullnet të mirë, shkoj me gatishmëri për marrëveshje dhe natyrisht që hollësitë e diskutimeve do të mund të vijnë në shprehje vetëm pas takimeve dhe pas marrëveshjeve, përkatësisht pas suksesit për të cilin urojmë sepse punojmë”, shtoi ai
Sot, nga ora 18:00 pritet të nis takimi ndërmjet kreut të LVV-së dhe kryetarit të LDK-së.
Seanca konstituive e Kuvendit të Kosovës për legjislaturën e 11-të, është thirrur më 6 gusht me fillim nga ora 10:00.
The post Pak para takimit me Abdixhikun, Kurti: Shkoj me vullnet të mirë për marrëveshje appeared first on Euronews Albania.
