Kryetari i AAK-së, Ramush Haradinaj ka mbajtur fjalën e tij në tubimin përmbyllës të fushatës elektorale teksa të dielën Kosova do të drejtohet në kutitë e votimit. Haradinaj gjatë fjalës së tij premtoi dyfishim të pagave dhe pensioneve.
Ai tha se anëtarësimi në NATO dhe ndryshimi i qasjes ekonomike janë kyçe për stabilitet, investime dhe ulje të çmimeve.
“Ne do t’i rrisim pagat pensionet dhe shtesat në dyfishim, e kemi të paraparë, e kemi shkruar, e kemi shpjeguar. Secili qytetar mund të shohë që do t’i rrisim pagat. Ju pyes kush mundet ta çlirojë Kosovën prej mafisë energjetike, a ka dikush në këtë vend?
Sot ne jemi të poshtëruar, gati po na dërgon në shkatërrim ekonomik mafia energjetike që i ka kapur ata që e qeverisin. Besoni nuk ma ndien për këta tregtarë as për këtë mafi energjetike, dikush duhet ta mbrojë këtë popull ta çlirojë nga ky tmerr i çmimeve, sepse energjia po na rrit të gjitha çmimet e tjera”, tha ai.
Haradinaj u shpreh se Kosova duhet të kryejë urgjentisht anëtarësimin në NATO, për të siguruar stabilitet dhe siguri afatgjate, dhe ndryshimin e qasjes politike dhe ekonomike.
“Lista 129, programi jonë bashkë me ju jemi në pozitën më të mirë ta vendosim Kosovën në NATO, t’i japim siguri të përjetshme, e cila na ndihmon të zhvillohet ekonomikisht, na trimëron të bashkëpunojmë me të gjithë, të largohemi nga gjendja e riciklimit të krizave apo mesazheve të gabuara, ku edhe vetë qeveria jonë flet, po na sulmon ky, po na sulmon ai, e pastaj ankohen që nuk ka investime.
Normal që nuk ka investime kur retorika jonë është gjithë kohën luftë po na sulmon tjetri. Ju lutem, për këto dy punë më besoni qytetarë të Kosovës, kudo që jeni, të gjithë pa marrë parasysh në cilën parti, nëse nuk i kryen Kosova këto dy punë, kemi me heq keq në këtë vend. Nëse i kryejmë këto dy punë shpejt, atëherë do të ulen çmimet”, tha Haradinaj.
Sipas tij programi i AAK-së synon siguri, zhvillim ekonomik dhe mirëqenie për çdo qytetar. Ai më tej premtoi se AAK do të jetë në krah të familjeve, punëtorëve, mjekëve, bujqve dhe bizneseve me synimin për një Kosovë më të qëndrueshme dhe më të begatë.
The post AAK mbyll fushatën elektorale: Anëtarësimi në NATO dhe ndryshimi i qasjes ekonomike, kyçe për stabilitet appeared first on Euronews Albania.
